മുല്ലപ്പെരിയാറില് പുതിയ അണക്കെട്ട്: സാധ്യതാ പഠനത്തിന് കേന്ദ്രത്തിന്റെ അനുമതി
ന്യൂഡല്ഹി: മുല്ലപ്പെരിയാറില് പുതിയ ഡാം നിര്മിക്കാന് പഠനം നടത്തുന്നതിന് കേന്ദ്രസര്ക്കാരിന്റെ അനുമതി. കേന്ദ്ര പരിസ്ഥിതി മന്ത്രാലയമാണ് അനുമതി നല്കിയത്. ഉപാധികളോടെയാണ് അനുമതി.
പുതിയ അണക്കെട്ടിനുള്ള വിവരശേഖരണ നടപടികളുമായി കേരളത്തിന് മുന്നോട്ട് പോകാം. പക്ഷേ, പഠനത്തിന് അനുമതി നല്കിയതുകൊണ്ട് പരിസ്ഥിതി അനുമതിക്ക് അര്ഹമാണെന്ന് അര്ഥമില്ലെന്നും സമിതി അറിയിച്ചു. തമിഴ്നാടിന്റെ സമ്മതത്തോടെ മാത്രമേ ഡാം നിര്മാണത്തിന് അനുമതി നല്കൂ എന്നും പരിസ്ഥിതിമന്ത്രാലയം വ്യക്തമാക്കി.
ഇത് രണ്ടാം തവണയാണ് അനുമതി നല്കുന്നത്. നേരത്തെ കേന്ദ്രം സാധ്യതാപഠനത്തിന് അനുമതി നല്കിയിരുന്നെങ്കില് തമിഴ്നാടിന്റെ പ്രതിഷേധത്തെ തുടര്ന്ന് പഠനം നടത്താന് സാധിച്ചിരുന്നില്ല. അന്ന് തമിഴ്നാട് മുഖ്യമന്ത്രിയായിരുന്ന ജയലളിത പഠനാനുമതിക്കെതിരെ കേന്ദ്രസര്ക്കാരില് പരാതി നല്കി. ഇതേത്തുടര്ന്ന് പരിസ്ഥിതി മന്ത്രാലയം അനുമതി പിന്വലിക്കുകയായിരുന്നു.
കേരളത്തിന്റെ ഏറെ നാളായുള്ള ആവശ്യമാണ് മുല്ലപ്പെരിയാറില് പുതിയ അണക്കെട്ട് എന്നുള്ളത്. മുല്ലപ്പെരിയാറില് 53.22 മീറ്റര് ഉയരത്തില് പുതിയ അണക്കെട്ട് നിര്മ്മിക്കാനാണ് കേരളം പദ്ധതിയിടുന്നത്. എന്നാല് പുതിയ അണക്കെട്ട് നിര്മ്മിക്കാനുള്ള കേരളത്തിന്റെ നീക്കത്തെ തമിഴ്നാട് ശക്തിയുക്തം എതിര്ക്കുകയാണ്. നിലവിലെ അണക്കെട്ട് സുരക്ഷിതമാണെന്നാണ് തമിഴ്നാട് വാദിക്കുന്നത്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."