കുറ്റ്യാടി: കുന്നുമ്മല്‍ ബ്ലോക്ക് പഞ്ചായത്തിനെ സമ്പൂര്‍ണ ഹോം ഷോപ്പ് ബ്ലോക്കായി മാറ്റുന്നതിനുള്ള കര്‍മ പരിപടികള്‍ക്ക് രൂപരേഖയായി. ഇതിനായി ബ്ലോക്ക് പരിധിയിലെ മുഴുവന്‍ സി.ഡി.എസുകളിലും നിലവില്‍ ഷോപ്പുകളില്ലാത്ത വാര്‍ഡുകളില്‍ ഹോം ഷോപ്പ് ഓണര്‍മാരെ പരിശീലനം നല്‍കി നിയമിക്കും.
പദ്ധതിയുടെ വിജയത്തിനായി ബ്ലോക്ക് പരിധിയിലെ പഞ്ചായത്ത് പ്രസിഡന്റുമാര്‍ ക്ഷേമകാര്യ സ്റ്റാന്റിങ് കമ്മിറ്റി ചെയര്‍മാന്‍മാര്‍ കുടുംബശ്രീ സി.ഡി.എസ് ഭാരവാഹികള്‍ എന്നിവരുടെ സംയുക്ത യോഗം ബ്ലോക്ക് പഞ്ചായത്ത് ഹാളില്‍ ചേര്‍ന്നു. പ്രാദേശികമായി നിര്‍മിക്കുന്ന കുടുംബശ്രീ ഉല്‍പ്പന്നങ്ങള്‍ സ്ഥിരമായി ഉപഭോക്താക്കളില്‍ എത്തിക്കുകയാണ് ഹോംഷോപ്പുകളുടെ ലക്ഷ്യം. 155കുടുംബങ്ങള്‍ പദ്ധതിയുടെ ഭാഗമാവും. മുഴുവന്‍ ഹോംഷോപ്പ് അംഗങ്ങളെയും ആരോഗ്യ ഇന്‍ഷുറന്‍സില്‍ ഉള്‍പ്പെടുത്താന്‍ നടപടി സ്വീകരിക്കും. യോഗത്തില്‍ കാവിലും പാറ പഞ്ചായത്ത് പ്രസിഡന്റ് അന്നമ്മജോര്‍ജ് അദ്ധ്യക്ഷയായി. കെ. സജിത്ത് ഉദ്ഘാടനം ചെയ്തു. കുടുംബശ്രീ ജില്ലാമിഷന്‍ എ.ഡി.എം.സി.മൊയ്തി എ.സി പദ്ധതി വിശദീകരിച്ചു. ശ്രീധരന്‍, റീന.പി.പ്രസാദ്, സിന്ധു പ്രസംഗിച്ചു.