രാജപുരം: രാജപുരത്ത് തുടര്‍ച്ചയായി രണ്ടാം തവണയും പുലിയെ കണ്ടതിനെ തുടര്‍ന്ന് വനപാലകര്‍ നിരീക്ഷണം ശക്തമാക്കി. പ്രദേശത്ത് പുലിയുടെ സാന്നിധ്യമുണ്ടെന്ന് പരിശോധന നടത്തിയ വനപാലകര്‍ ഏതാണ്ട് ഉറപ്പിച്ചു. പുഞ്ചക്കര എലിക്കോട്ട്കയയിലാണ് കഴിഞ്ഞ ദിവസം പുലിയെ കണ്ടതായി നാട്ടുകാര്‍ അധികൃതരെ അറിയിച്ചത്. ഇതേ തുടര്‍ന്ന് കാഞ്ഞങ്ങാട് ഫോറസ്റ്റ് ഓഫിസര്‍ സുധീര്‍ നെരോത്ത് ഇന്നലെ പുലര്‍ച്ചെ പ്രദേശം സന്ദര്‍ശിച്ചു. രണ്ടുദിവസം മുമ്പ് സംസ്ഥാന പാതയില്‍ വണ്ണാത്തിക്കാനത്തും പുലിയെ കണ്ടതായി നാട്ടുകാര്‍ അറിയിച്ചിരുന്നു. തുടര്‍ന്നാണ് ഉദ്യോഗസ്ഥര്‍ പ്രദേശത്ത് നിരീക്ഷണം നടത്തിയത്.
പ്രദേശത്തെ വീടുകളിലെ നായകളെ ഭയചകിതരായാണ് കണ്ടതെന്ന് ഫോറസ്റ്റ് ഓഫിസര്‍ പറഞ്ഞു. പുലിയെപ്പോലുള്ള അജ്ഞാത ജീവികള്‍ പ്രദേശത്ത് കറങ്ങിയതിന്റെ സൂചനയാണ് നായ്ക്കളെ ഭയത്തോടെ കാണാനിടയായതെന്നും അദ്ദേഹം പറഞ്ഞു. ഇതേ അവസ്ഥ തുടര്‍ന്നാല്‍ കാമറ സ്ഥാപിക്കാനും കൂടൊരുക്കാനും അധികൃതര്‍ ആലോചിക്കുന്നുണ്ട്.
പുലിയെ കണ്ടതായി പറയുന്ന എലിക്കോട്ട്കയയുടെ സമീപപ്രദേശങ്ങളായ കോട്ടക്കുന്ന്, അരിങ്കല്ല് എന്നിവിടങ്ങളില്‍ ഏതാനും നാളുകള്‍ക്കു മുന്‍പു പുലികളെ ചത്ത നിലയില്‍ കണ്ടെത്തിയിരുന്നു. ഇതാണ് പുലി സാന്നിധ്യമുണ്ടെന്ന് അധികൃതര്‍ ഉറപ്പിച്ചത്.