കല്‍പ്പറ്റ: പ്രളയാനന്തരം സ്‌കൂളില്‍ തിരിച്ചെത്താത്ത മുഴുവന്‍ കുട്ടികളെയും നവംബര്‍ 12നകം തിരിച്ചെത്തിക്കുമെന്ന് ജില്ലാ പഞ്ചായത്ത് പ്രസിഡന്റ് കെ.ബി നസീമ വാര്‍ത്താസമ്മേളനത്തില്‍ അറിയിച്ചു.
പ്രളയാനന്തരം സ്‌കൂളുകളില്‍ നിന്നും കട്ടികളുടെ വ്യാപകമായ കൊഴിഞ്ഞു പോക്ക് ശ്രദ്ധയില്‍ പ്പെട്ടിതിനെത്തുടര്‍ന്നാണ് ജില്ലാ പഞ്ചായത്തിന്റെ ഇടപെടല്‍. ഇതിനായി ജനകീയ ഇടപെടല്‍ നടത്തും. കുട്ടികളെ തിരിച്ചെത്തിക്കുന്നതിന്റെ ഭാഗമായി 29ന് രാവിലെ ഹൈസ്‌കൂള്‍, ഹയര്‍ സെക്കണ്ടറി പ്രിന്‍സിപ്പാള്‍മാര്‍, എച്ച്.എം, പി.ടി.എ പ്രസിഡന്റുമാര്‍, ബ്ലോക്ക് പ്രസിഡന്റുമാര്‍, മുനിസിപ്പല്‍ ചെയര്‍മാന്‍മാര്‍, സ്റ്റാന്റിങ് കമ്മിറ്റി ചെയര്‍മാന്‍മാര്‍, ജില്ലയിലെ വിദ്യാഭ്യാസ ഓഫിസര്‍മാര്‍, കുടുബശ്രീ സാക്ഷരതാ കോര്‍ഡിനേറ്റര്‍, ഐ.ടി.ഡി.പി തുടങ്ങിയവരുടെ വിപുലമായ യോഗം കലക്ടറേറ്റിലെ എ.പി.ജെ ഹാളില്‍ നടക്കും.
അന്നേ ദിവസം ഉച്ചക്ക് രണ്ട് മണിക്ക് വൈത്തിരി ഉപജില്ലയിലെ ട്രൈബല്‍ ഓഫിസര്‍മാര്‍, പഞ്ചായത്ത് പ്രസിഡന്റുമാര്‍ സ്റ്റാന്റിങ് കമ്മിറ്റി, പി.ടി.എ, എച്ച്.എം തുടങ്ങിയവരുടെ യോഗവും നടക്കും. സ്‌കൂളിലെത്തിച്ച ശേഷം അവരെ നിലനിര്‍ത്തുന്നതിന്നാവശ്യമായ പ്രവര്‍ത്തനങ്ങള്‍ ജില്ലാ പഞ്ചായത്തിന്റെ ട്രോപ്ഔട്ട്ഫ്രീ വയനാട് എന്ന പ്രോജക്ടില്‍ ഉള്‍പ്പെടുത്തി നടത്തുമെന്നും പ്രസിഡന്റ് നസീമ അറിയിച്ചു.ജില്ലയിലെ മുഴുവന്‍ എസ്.ടി കട്ടികള്‍ക്കുമായി മോട്ടിവേഷന്‍, റസിഡന്‍ഷ്യല്‍ ക്യാംപുകള്‍ ഉള്‍പ്പെടെ നടത്തും.