മലപ്പുറം: ദേശീയ വിരമുക്ത ദിനത്തിന്റെ ഭാഗമായി ഐ.സി.ഡി.എസ് സൂപ്പര്‍വൈസര്‍മാര്‍ക്ക് ആരോഗ്യ വകുപ്പിന്റെ ആഭിമുഖ്യത്തില്‍ പരിശീലനം നല്‍കി. വിരബാധമൂലം കുട്ടികളിലുണ്ടാകുന്ന വിളര്‍ച്ച, പോഷകകുറവ്, പഠിക്കാനുള്ള കഴിവും ഏകാഗ്രതയും കുറയുക തുടങ്ങിയ ആരോഗ്യ പ്രശ്‌നങ്ങള്‍ തടയുന്നതിനാണ് ഓഗസ്റ്റ് 10 ദേശീയ വിരമുക്ത ദിനമായി ആചരിക്കുന്നത്. ഇതിന്റെ ഭാഗമായി 10ന് അങ്കണവാടികളും  വിദ്യാലയങ്ങളും കേന്ദ്രീകരിച്ച് ആല്‍ബന്റസോള്‍ ഗുളികകള്‍ നല്‍കുമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു. തികച്ചും സുരക്ഷിതവും പാര്‍ശ്വഫലങ്ങളില്ലാത്തതുമായ ഗുളിക ഒന്നു മുതല്‍ 19 വയസ് വരെയുള്ള കുട്ടികള്‍ക്ക് സൗജന്യമായി നല്‍കും. ഇതു സംബന്ധിച്ച് ഐ.സി.ഡി.എസ് സൂപ്പര്‍വൈസര്‍മാര്‍ക്ക് നടത്തിയ ജില്ലാതല പരിശീലനത്തിന്  ഡെപ്യൂട്ടി ഡി.എം.ഒ ഡോ. എ. ഷിബുലാല്‍ നേതൃത്വം നല്‍കി.