കണ്ണൂര്‍: ഇന്നത്തെ അധ്യാപകര്‍ക്ക് ജോലിയോട് ആത്മാര്‍ഥതയില്ലെന്ന് കഥാകൃത്ത് ടി. പത്മനാഭന്‍. ജില്ലാ ലൈബ്രറി കൗണ്‍സില്‍ സംഘടിപ്പിച്ച മെഗാ വായനാമത്സരം ഉദ്ഘാടനം ചെയ്യുകയായിരുന്നു അദ്ദേഹം.
തന്റെ ഈ പരാമര്‍ശത്തില്‍ ആരെങ്കിലും പ്രതിഷേധിച്ചാല്‍ തനിക്കൊരു ചുക്കുമില്ല. ലക്ഷങ്ങള്‍ കോഴ നല്‍കി ജോലിക്ക് കയറുന്ന അധ്യാപകര്‍ക്ക് എന്ത് സാമൂഹ്യ പ്രതിബദ്ധതയാണ് ഉണ്ടാകുക. അധ്യാപകനാകാത്തത് എന്റെ ഭാഗ്യം. പഴയകാലത്ത് വിദ്യാര്‍ഥികള്‍ നേരിടുന്ന സാമൂഹ്യപ്രശ്‌നങ്ങള്‍ വരെ അധ്യാപകര്‍ അറിയും.
എന്നാല്‍, ഇന്ന് അതൊന്നും അധ്യാപകരുടെ ചുമതലയേ അല്ല. ഒളിവര്‍ ട്വിസ്റ്റും പാവങ്ങളും വായിക്കാന്‍ ഇന്ന് എത്ര അധ്യാപകര്‍ വിദ്യാര്‍ഥികളോട് പറയുന്നുണ്ട്. പഴയകാലത്തെ അധ്യാപകര്‍ എല്ലാ വിഷയങ്ങളും പഠിപ്പിക്കും. വിദ്യാര്‍ഥികളുടെ ചുമലില്‍ ഇത്രയും പുസ്തകവും ഇല്ലായിരുന്നുവെന്നും അദ്ദേഹം പറഞ്ഞു.