തിരുവനന്തപുരം: ചെന്നൈയില്‍ ഡിസംബര്‍ ഏഴു മുതല്‍ ഒന്‍പതു വരെ നടക്കുന്ന മെയ്ക്ക് ദ ഫ്യൂച്ചര്‍ ഷെല്‍ ഇക്കോ മാരത്തോണ്‍ ചലഞ്ചറില്‍ കേരളത്തിലെ എന്‍ജിനീയറിങ് കോളജ് വിദ്യാര്‍ഥികള്‍ തങ്ങള്‍ രൂപകല്‍പ്പന ചെയ്ത ഇന്ധന ക്ഷമതയുള്ള സംവിധാനങ്ങള്‍ അവതരിപ്പിക്കും.
ഗവണ്‍മെന്റ് എന്‍ജിനീയറിങ് കോളജ്, ബാര്‍ട്ടണ്‍ ഹില്‍, എറണാകുളം ആദി ശങ്കര ഇന്‍സ്റ്റിറ്റ്യൂട്ട് ഓഫ് എന്‍ജിനീയറിങ് ആന്‍ഡ് ടെക്‌നോളജി എന്നിവിടങ്ങളില്‍നിന്നുള്ള ടീമുകളാണ് മദ്രാസ് റേസ് ട്രാക്കില്‍ നടത്തുന്ന പരിപാടിയില്‍ പങ്കെടുക്കുന്നത്.
ഹോണ്ട ജി.എക്‌സ് 35 സി.സി എഞ്ചിനുമായി ഇലക്ട്രോണിക് ഇന്‍ജക്ഷനിലൂടെ 200 കിലോമീറ്റര്‍ മൈലേജ് ലഭിക്കുന്ന സംവിധാനമാണ് തിരുവനന്തപുരം എന്‍ജിനീയറിങ് കോളജില്‍ നിന്നുള്ള ഒന്‍പതംഗ സംഘം അവതരിപ്പിക്കുന്നത്.
അലൂമിനിയം ഷാസിയോടെയും പരിസ്ഥിതി സൗഹാര്‍ദ്ദമായും കുറഞ്ഞ ഭാരത്തോടു കൂടിയതുമായ എയറോ ഡൈനാമിക് രൂപകല്‍പ്പനയാണ് ഈ കാറിനുള്ളത്. ഈ മേഖലയിലെ ഗുണമേന്‍മയുള്ള എന്‍ജിനീയര്‍മാരായി മാറാന്‍ ഈ പരിപാടി തങ്ങളെ സഹായിക്കുമെന്ന് സംഘത്തിന്റെ മാനേജറായ എ. ശ്രീകിരണ്‍ ചൂണ്ടിക്കാട്ടി.
ഇലക്ട്രിക് ബാറ്ററിയാണ് ആദി ശങ്കര കോളജില്‍ നിന്നുള്ള 14 അംഗ സംഘം അവതരിപ്പിക്കുന്നത്.
തങ്ങളുടെ കണ്ടെത്തലുകള്‍ ലോകത്തിനു മുന്നില്‍ അവതരിപ്പിക്കുന്നതോടൊപ്പം മറ്റുള്ള ടീമുകളില്‍ നിന്നുള്ള അറിവു നേടിയെടുക്കാനും ഇതു സഹായകമാകുമെന്ന് സംഘത്തിന്റെ മാനേജര്‍ ജസ്റ്റിന്‍ കോളിന്‍ കൊറയ പറഞ്ഞു.