ന്യൂഡല്‍ഹി: പൗരത്വ ഭേദഗതി നിയമത്തിനെതിരെ ജാമിയ മില്ലിയ വിദ്യാര്‍ഥികള്‍ നടത്തിയ പ്രതിഷേധത്തിന് ഐക്യദാര്‍ഢ്യം പ്രഖ്യാപിച്ച് സുപ്രിം കോടതി മുന്‍ ജഡ്ജി മാര്‍ക്കണ്ഡേയ കട്ജു. വിദ്യാര്‍ഥിനികള്‍ക്കു നേരെ പൊലീസ് നടത്തിയ അക്രമങ്ങളുടെ ഒരു വീഡിയോ പങ്കുവെച്ച് അദ്ദേഹം ട്വീറ്റ് ചെയ്തു.

'കാത്തിരുന്ന വിപ്ലവം വരുന്നുവെന്ന് ഞാന്‍ ഇപ്പോള്‍ ഉറപ്പുനല്‍കുന്നു' - അദ്ദേഹം ട്വീറ്റ് ചെയ്തു.

ജാമിഅ മില്ലിയ സര്‍വ്വകലാശാല കാമ്പസില്‍ ഇന്നലെ രാത്രി പൊലിസിന്റെ അഴിഞ്ഞാട്ടമാണ് നടന്നത്. കണ്ണില്‍ കണ്ട കുട്ടികളെയെല്ലാം തല്ലിച്ചതച്ച ഇവര്‍ കാമ്പസിലേക്ക് വെടിവെപ്പു നടത്തി. ടിയര്‍ ഗ്യാസ്, റബ്ബര്‍ ബുള്ളറ്റ് തുടങ്ങിയവയെല്ലാം പ്രയോഗിച്ചു. ലൈബ്രറി, റീഡിങ് റൂം, കാന്റീന്‍ തുടങ്ങി കാമ്പസിനകത്തെ ഓരോ മുക്കിലും മൂലയിലും പൊലിസ് അതിക്രമിച്ചു കയറി. തുടര്‍ന്ന് പൊലിസ് ഹെഡ് ക്വാര്‍ട്ടേഴ്‌സിനു മുന്നില്‍ തലസ്ഥാനത്തെ മുഴുവന്‍ സര്‍വ്വകലാശാലയിലേയും വിദ്യാര്‍ഥികള്‍ പ്രതിഷേധവുമായി ഒത്തു കൂടി. അലിഗഡ് സര്‍വ്വകലാശാലയിലും പൊലിസ് കടന്നു കയറി അക്രമം അഴിച്ചു വിട്ടിരുന്നു.

മാത്രമല്ല, ജാമിയയിലെ അക്രമത്തിനെതിരെ രാജ്യമെമ്പാടും ഇന്നലെ രാത്രിയും തിങ്കളാഴ്ച പുലര്‍ച്ചെയുമായി വിദ്യാര്‍ഥികളും രാഷ്ട്രീയപ്പാര്‍ട്ടികളും വിവിധ പ്രതിഷേധങ്ങള്‍ സംഘടിപ്പിച്ചിരുന്നു.

ജാമിയ വിദ്യാര്‍ഥികള്‍ക്ക് ഐക്യദാര്‍ഢ്യം പ്രഖ്യാപിച്ച് അലിഗഢ് മുസ്‌ലിം സര്‍വകലാശാല, ബനാറസ് ഹിന്ദു സര്‍വകലാശാല, ബോംബെ സര്‍വകലാശാല എന്നിവിടങ്ങളിലെ വിദ്യാര്‍ഥികള്‍ തെരുവിലിറങ്ങി.