കൊയിലാണ്ടി: നഗരത്തില്‍ മാലിന്യങ്ങള്‍ കളയുന്നത് ദുരിതമാകുന്നു. ട്രാഫിക്ക് പൊലിസ് സ്റ്റേഷന്‍ റോഡ്, ടെലഫോണ്‍ എക്‌സ്‌ചേഞ്ച്, മീത്തലക്കണ്ടി എന്നിവിടങ്ങളിലാണ് ഇരുട്ടിന്റെ മറവില്‍ വീടുകളിലെയും, വ്യാപാര സ്ഥാപനങ്ങളിലേയും മാലിന്യങ്ങള്‍ കളയുന്നത്. കല്യാണവീടുകളിലെയും, കോഴി കടകളിലെയും അവശിഷ്ടങ്ങളും നടപ്പാതകളിലും, ഡ്രൈനേജുകളിലും നിക്ഷേപിക്കുന്നുണ്ട്.
മാലിന്യങ്ങള്‍ നിറഞ്ഞ് ഡ്രൈനേജുകളില്‍ അഴുക്ക് വെള്ളം കെട്ടിക്കിടക്കുന്നത് ഗുരുതരമായ പരിസര മലിനീകരണ പ്രശ്‌നങ്ങളാണുണ്ടാക്കുന്നത്. ഡെങ്കിപ്പനിയടക്കമുള്ള പകര്‍ച്ച വ്യാധികള്‍ക്കെതിരേ ആരോഗ്യ വകുപ്പ് നടത്തുന്ന പ്രതിരോധ പ്രവര്‍ത്തനങ്ങള്‍ വ്യാപകമായ രീതിയില്‍ നടക്കുന്നതിനിടയിലാണ് ആരോഗ്യ കാംപയിന്‍ പ്രവര്‍ത്തനങ്ങളെ അവഗണിക്കുന്ന രീതിയില്‍ മാലിന്യങ്ങള്‍ പൊതുസ്ഥലങ്ങളില്‍ നിക്ഷേപിക്കുന്നത്. ഗുരുതരമായ ആരോഗ്യ പ്രശ്‌നങ്ങള്‍ ഉണ്ടാക്കുന്ന രീതിയില്‍ മാലിന്യം നിക്ഷേപിക്കുന്നവരെ കണ്ടെത്തി ശിക്ഷിക്കണമെന്ന ആവശ്യവും ശക്തമാണ്.