ദമാം: ഭരണഘടനാ വിരുദ്ധമായ പൗരത്വ ഭേദഗതി നടപ്പാക്കുന്നതില്‍ പ്രതിഷേധിച്ച് വെൽഫെയർ പാർട്ടി, എസ്.ഡി.പി.ഐ, ബി എസ്.പി തുടങ്ങിയ വിവിധ രാഷ്ട്രീയ പാര്‍ട്ടികളും മത-സാമുദായിക, മനുഷ്യാവകാശ പ്രസ്ഥാനങ്ങളുടെയും സംയുക്താഭിമുഖ്യത്തില്‍ കേരളത്തിൽ നടത്തിയ ജനകീയ ഹർത്താൽ വിജയിപ്പിച്ച മുഴുവൻ ജനാധിപത്യ മതേതര വിശ്വാസികൾക്കും പ്രവാസി സാംസ്‌കാരിക വേദിയും ഇന്ത്യൻ സോഷ്യൽ ഫോറവും സംയുക്തമായി നന്ദി അറിയിച്ചു. വംശീയതയുടെ പേരിൽ ഇന്ത്യൻ ഭരണഘടനയെത്തന്നെ തകർത്ത് വിവേചനം അടിച്ചേൽപ്പിക്കാനുള്ള ശ്രമത്തെ ഇന്ത്യൻ ജനത കരുത്തോടെ ചെറുത്ത് തോൽപ്പിക്കും. ഹർത്താലിനെ പരാജയപ്പെടുത്താൻ ചിലർ നടത്തിയ എല്ലാ വിഫല ശ്രമങ്ങളെയും ജനം തള്ളിക്കളഞ്ഞു. ഈ ജനകീയ ഹർത്താൽ കേരള‌ ജനത ഏറ്റെടുത്തതിന്റെ തെളിവാണു സമാധാനപരമയി നടന്ന ഹർത്താലിന്റെ പൂർണ്ണ വിജയം. ജനകീയ സമരത്തെ പരാജയപ്പെടുത്താൻ നടത്തിയ പരിശ്രമങ്ങളെ നേതാക്കൾ ശക്തമായി അപലപിച്ചു.

 സമരം പരാജയപ്പെടുത്താൻ ഭരണകൂടം പോലീസിനെ ഉപയോഗിച്ച് സംയുക്ത സമര വേദി നേതാക്കളെയും പ്രവർത്തകരെയും കരുതൽ‌ തടങ്കൽ എന്ന പേരിൽ അറസ്റ്റ് ചെയ്ത നടപടി ഭീരുത്വമാണ്. അറസ്റ്റ് ചെയ്തവർക്ക് നേരെ പലയിടങ്ങളിലും ക്രൂരമായ മർദ്ദനങ്ങളാണ് അഴിച്ചു വിടുന്നത്. അതിക്രമങ്ങൾ നിർത്തി വെച്ച് അറസ്റ്റ് ചെയ്ത സമരക്കാരെ ഉടൻ വിട്ടയക്കണം. ഫാഷിസ്റ്റു സർക്കാരിന്റെ പൗരത്വ ബില്ലിനെതിനെതിരെ നടക്കുന്ന പ്രതിഷേധങ്ങളെ ചോരയിൽ മുക്കിക്കൊല്ലുന്ന നിലപാടുകൾ കേരളീയ ജനത അംഗീകരിക്കില്ല. സമരമാർഗത്തിൽ മരണം വരിച്ച എസ്.ഡി.പി.ഐ മുൻ കോഴിക്കോട് ജില്ലാ സെക്രട്ടറി നജീബ് അത്തോളിയുടെ നിര്യാണത്തിൽ അനുശോചനവും രേഖപ്പെടുത്തുന്നതായും‌ നേതാക്കളായ നാസർ കൊടുവള്ളി (ഇന്ത്യൻ സോഷ്യൽ ഫോറം), എം.കെ. ഷാജഹാൻ (പ്രവാസി സാംസ്‌കാരിക വേദി) എന്നിവർ പുറത്തിറക്കിയ സംയുക്ത പ്രസ്താവനയിൽ അറിയിച്ചു.