കുമളി: ആനക്കൊമ്പുകള്‍ വില്‍ക്കാനെത്തിയ തമിഴ്‌നാട് സ്വദേശികളെ കുമളിയില്‍ വനപാലകര്‍ പിടികൂടി. തേനി ജില്ലയിലെ കെ.ജി പെട്ടി സ്വദേശികളായ ഗംഗന്‍, പ്രഭു എന്നിവരാണ് അറസ്റ്റിലായത്. തിങ്കളാഴ്ച രാത്രി പെരിയാര്‍ കടുവാ സങ്കേതത്തിന്റെ അതിര്‍ത്തിയിലെ ജനവാസ മേഖലയായ റോസാപ്പൂക്കണ്ടത്തു വച്ചാണ് ഇവരെ അറസ്റ്റ് ചെയ്തത്.
രാത്രികാല പരിശോധനക്കിടെ തമിഴ്‌നാട് അതിര്‍ത്തികൂടിയായ റോസാപ്പൂക്കത്ത് സംശയാസ്പദമായ സാഹചര്യത്തില്‍ ഇവര്‍ നില്‍ക്കുന്നത് വനപാലകരുടെ ശ്രദ്ധയില്‍പ്പെട്ടിരുന്നു. തുടര്‍ന്ന് ഇവരുടെ കൈവശമുണ്ടായിരുന്ന ചാക്കുകെട്ട് അഴിച്ചു പരിശോധിച്ചപ്പോഴാണ് ആനക്കൊമ്പ് കണ്ടെത്തിയതെന്ന് ഉദ്യോഗസ്ഥര്‍ പറയുന്നു. ഏതാനും ദിവസങ്ങള്‍ക്കു മുന്‍പ് പെരിയാര്‍ വന്യജീവി സാങ്കേതത്തില്‍ ഉള്‍പെട്ടതും തമിഴ്‌നാട് വനമേഖലയുടെ അതിര്‍ത്തി പങ്കിടുന്ന മേഘമല വന്യജീവി സങ്കേതത്തിനു സമീപത്തെ വെണ്ണിയാര്‍ ഭാഗത്ത് വൈദ്യുതാഘാതമേറ്റ് ആനകള്‍ ചരിഞ്ഞിരുന്നു. ഇവയുടെ കൊമ്പുകളാണ് ഇപ്പോള്‍ പിടികൂടിയതെന്നാണ് അധികൃതര്‍ പറയുന്നത്. ഏകദേശം നാല്‍പതു വയസ് പ്രായം വരുന്ന ആനയുടേതാണ് പിടികൂടിയ കൊമ്പുകള്‍. ഓരോന്നിനും അരമീറ്ററിലധികം നീളവും പത്ത് കിലോയോളം തൂക്കവുമുണ്ട്. വിപണിയില്‍ ഇവയ്ക്ക് അഞ്ചു ലക്ഷത്തോളം രൂപ വിലമതിക്കുമെന്നും പ്രതികളിലൊരാളായ ഗംഗന്‍ മുന്‍പും ഇത്തരം കേസുകളില്‍ ഉള്‍പ്പെട്ടിട്ടുള്ളയാളാണെന്നും വനപാലകര്‍ പറഞ്ഞു.
പെരിയാര്‍ കടുവാ സങ്കേതം അധികൃതര്‍ നല്‍കിയ വിവരത്തെ തുടര്‍ന്ന് തമിഴ്‌നാട്ടില്‍ നില്‍ന്നുള്ള വനംവകുപ്പ് ഉദ്യോഗസ്ഥര്‍ കുമളിയില്‍ എത്തി വിവരങ്ങള്‍ ശേഖരിച്ചു. ഇടനിലക്കാര്‍ മുഖേന കേരളത്തില്‍ വില്‍പന നടത്തുവാനാണ് ഇവിടെ എത്തിച്ചതെന്നാണ് പിടിയിലായവര്‍ നല്‍കുന്ന വിവരം. കുമളി സ്വദേശിയായ ബാബു എന്നയാളുടെ ആവശ്യപ്രകാരമാണ് ഇവ കൊണ്ടുവന്നതെന്ന് ഇവര്‍ മൊഴി നല്‍കി.
തേക്കടി ഫോറസ്റ്റ് റേഞ്ച് ഓഫിസര്‍ അനുരാജ്, ബീറ്റ് ഫോറസ്റ്റ് ഓഫിസര്‍മാരായ സൂരജ് സന്തോഷ്, ഷിന്റോ തോമസ്, വാച്ചര്‍ രാജന്‍, അനില്‍, റാഫി എന്നിവര്‍ അടങ്ങുന്ന സംഘമാണ് പ്രതികളെ പിടികൂടിയത്.