നെടുമ്പാശ്ശേരി: സംസ്ഥാന ഹജ്ജ് കമ്മിറ്റി മുഖേന ഈ വര്‍ഷം ഹജ്ജിന് പോകാന്‍ അനുമതി ലഭിച്ചിട്ടുള്ള തീര്‍ഥാടകരുടെ യാത്രാ ഷെഡ്യൂള്‍ ലഭ്യമായി തുടങ്ങി.
നെടുമ്പാശ്ശേരി അന്താരാഷ്ട്ര വിമാനത്താവളത്തില്‍നിന്ന് ഈ മാസം 13 മുതലാണ് തീര്‍ഥാടകര്‍ യാത്രയാകുന്നത്.
ആദ്യ ദിവസങ്ങളിലെ വിമാനങ്ങളില്‍ യാത്ര തിരിക്കുന്നവരുടെ സമയക്രമമാണ് ഇപ്പോള്‍ ലഭ്യമായിട്ടുള്ളത്. രണ്ടു ദിവസത്തിനകം മുഴുവന്‍ തീര്‍ഥാടകരുടെയും വിവരങ്ങള്‍ ലഭ്യമാകുമെന്നാണ് പ്രതീക്ഷിക്കുന്നത്.
ഹജ്ജ് കമ്മിറ്റിയുടെ ഔദ്യോഗിക വെബ്‌സൈറ്റില്‍നിന്ന് തീര്‍ഥാടകര്‍ക്ക് അവരുടെ യാത്രാ തിയതി അറിയാനാകും. കവര്‍ നമ്പറില്‍ സെര്‍ച്ച് ചെയ്തും വിവരങ്ങള്‍ ശേഖരിക്കാം. ഇതുകൂടാതെ ട്രെയിനര്‍മാര്‍ ഓരോ തീര്‍ഥാടകരെയും വിവരം അറിയിക്കും. കേരളം, മാഹി, ലക്ഷദ്വീപ് എന്നിവിടങ്ങളില്‍ നിന്നുള്ള 11771 തീര്‍ഥാടകര്‍ക്കാണ് നെടുമ്പാശ്ശേരിയില്‍നിന്ന് യാത്ര തിരിക്കാന്‍ അവസരം ലഭിച്ചിരിക്കുന്നത്.
ഇതില്‍ 11423 പേര്‍ കേരളത്തില്‍ നിന്നും 303 പേര്‍ ലക്ഷദ്വീപില്‍ നിന്നും 45 പേര്‍ മാഹിയില്‍ നിന്നുമുള്ളവരാണ്.