ജിദ്ദ: കിഴക്കൻ ഏറനാടിന്റെ മത - ഭൗതിക വിദ്യഭ്യാസ പുരോഗതിയിൽ നിർണ്ണായക പങ്ക് വഹിക്കുന്ന മേലാറ്റൂർ ദാറുൽ ഹികം ഇസ്‌ലാമിക് സെന്റർ ജനറൽ സെക്രട്ടറി മൊയ്‌ദീൻ കുട്ടി ഫൈസി പുത്തനഴി, ശരീഅത് & ആർട്സ് കോളേജ് പ്രിൻസിപ്പൽ ടി എച്ച് ദാരിമി എന്നിവർക്ക് ദാറുൽ ഹികം ജിദ്ദ കമ്മിറ്റിയുടെ ആഭിമുഖ്യത്തിൽ സ്വീകരണം നൽകി. ഷറഫിയ്യ ദാറുസ്സലാം ഓഡിറ്റോറിയത്തിൽ വെച്ച് നടന്ന പരിപാടിയിൽ പ്രസിഡന്റ് സയ്യിദ് ഉബൈദുല്ല തങ്ങൾ മേലാറ്റൂർ അധ്യക്ഷത വഹിച്ചു. പുത്തനഴി മൊയ്‌ദീൻ കുട്ടി ഫൈസി ഉദ്ഘാടനം ചെയ്‌തു. സമസ്‌ത നേതാവും പണ്ഡിതനും ചിന്തകനും സാമൂഹ്യ പ്രവർത്തകനുമായിരുന്ന മർഹൂം നാട്ടിക മൂസ മൗലവി തുടങ്ങി വെച്ച ദാറുൽ ഹികം ഇസ്‍ലാമിക് സെന്ററിന് കീഴിൽ ഇപ്പോൾ പ്രവർത്തിക്കുന്ന സ്ഥാപനങ്ങളെപ്പറ്റി അദ്ദേഹം വിശദീകരിച്ചു.
      ദാറുൽ ഹികം ശരീഅത് & ആർട്സ് കോളേജ് പ്രിൻസിപ്പൽ ടി. എച്ച്. ദാരിമി മുഖ്യ പ്രഭാഷണം നടത്തി. സ്ഥാപനത്തിന്റെ പഴയ കാര്യ ദർശിയും സമസ്‌ത നേതാവുമായിരുന്ന മർഹൂം കുഞ്ഞാണി മുസ്‌ലിയാരുടെ സ്‌മരണക്കായി സ്ഥാപിക്കുന്ന ആധുനിക സൗകര്യങ്ങളുള്ള ലൈബ്രറിയെപ്പറ്റിയും കോൺഫറൻസ് ഹാളും ഫെബ്രുവരി 8 നു പാണക്കാട് സയ്യിദ് ഹൈദരലി ശിഹാബ് തങ്ങൾ ഉദ്ഘാടനം നിർവഹിക്കുമെന്നും ഇതിന്റെ പൂർത്തീകരണത്തിന് പ്രവാസികളുടെ സഹകരണം വേണമെന്നും അദ്ദേഹം പറഞ്ഞു.
സയ്യിദ് സൈനുൽ ആബിദീൻ തങ്ങൾ, അബുബക്കർ ദാരിമി ആലമ്പാടി, മുസ്‌തഫ ഫൈസി ചേരൂർ, നാസർ കാടാമ്പുഴ, അബ്ദുറഹ്മാൻ ആയക്കോടൻ, മൻസൂർ എടക്കര, സക്കീർ ഹുസ്സൈൻ, അബ്ദുൽ ഗഫൂർ, മുസ്‌തഫ കളത്തിൽ തുടങ്ങിയവർ സംസാരിച്ചു. മുഹമ്മദലി സ്വാഗതവും പി.കെ യുസുഫ് നന്ദിയും പറഞ്ഞു.