മനാമ : ഫ്രന്റ്‌സ് സോഷ്യല്‍ അസോസിയേഷന്റെ ആഭിമുഖ്യത്തില്‍ രൂപീകരിച്ച പൊതുസാഹിത്യ സാംസ്‌കാരിക വേദിയായ സൗഹൃദവേദിയുടെ ഉദ്ഘാടനവും സാംസ്‌ക്കാരിക സമ്മേളനവും ബഹ്‌റൈന്‍ പ്രവാസി സമൂഹത്തിലെ വിവിധ തലങ്ങളില്‍ നിന്നുളളവരുടെ സംഗമ വേദിയായി. എഴുത്തുകാര്‍, കലാകാരന്‍മാര്‍, സാമൂഹിക സാംസ് കാരിക പ്രവര്‍ത്തകര്‍, വായനക്കാര്‍ തുടങ്ങിയവര്‍ ഒത്തുചേര്‍ന്ന സൗഹൃദ വേദിയുടെ ഉദ്ഘാടനം ബഹ്‌റൈന്‍ കേരളീയ സമാജം പ്രസിഡന്റ് പി.വി രാധാകൃഷ്ണ പിള്ള നിര്‍വഹിച്ചു.

പല ഇസങ്ങളുടെയും ജാതിയുടെയും പേരില്‍ തമ്മിലടിക്കുന്ന വര്‍ത്തമാനകാലത്ത് സത്യവും നന്മയും ധര്‍മവും സമൂഹത്തില്‍ ഉല്ലേഖനം ചെയ്യാന്‍ എഴുത്തുകാര്‍ക്ക് സാധിക്കുമെന്ന് അദ്ദേഹം തന്റെ ഉദ്ഘാടക പ്രസംഗത്തില്‍ പറഞ്ഞു. എല്ലാവരുടേയും അഭിപ്രായങ്ങളെ മാനിക്കാനും ആശയങ്ങളെ കേള്‍ക്കാനും അംഗീകരിക്കാനും നമുക്കോരോരുത്തര്‍ക്കും കഴിയേണ്ടതുണ്ടെന്നും അദ്ദേഹം കൂട്ടി ചേര്‍ത്തു. തിന്മകള്‍ക്കെതിരെ പ്രതികരിക്കാന്‍ ഓരോ എഴുത്തുകാരനും കഴിയേണ്ടതുണ്ടെന്നും അവര്‍ സാമൂഹ്യ പ്രതിബദ്ധതയുള്ളവരായിരിക്കണമെന്നും ആശംസയര്‍പ്പിച്ച് സംസാരിച്ചവര്‍ പറഞ്ഞു. മാധ്യമം ചീഫ് കറസ്‌പോണ്ടന്റ്് ഷമീര്‍ മുഹമ്മദ്, ഫ്രന്റ്‌സ് പ്രസിഡന്റ്് ജമാല്‍ ഇരിങ്ങല്‍, ജന. സെക്രട്ടറി എം.എം സുബൈര്‍, മീഡിയ വണ്‍ റിപ്പോര്‍ട്ടര്‍ സിറാജ് പള്ളിക്കര, എഴുത്തുകാരായ മോഹന്‍ പുത്തന്‍ ചിറ, ആദര്‍ശ് മാധവന്‍ കുട്ടി, പങ്കജ് നാഭന്‍, നിരജ്ഞന്‍, ബാലചന്ദ്രന്‍ കൊന്നക്കാട്, മായാ കിരണ്‍, ഷീജ ജയന്‍ എന്നിവര്‍ ആശംസ നേര്‍ന്ന് സംസാരിച്ചു. പരിപാടിയുടെ ഭാഗമായി യുവ എഴുത്തുകാരന്‍ ജയചന്ദ്രന്‍ ചെക്യാട് രചിച്ച 'തേന്‍ വരിക്ക' എന്ന കവിതാ സമാഹാരത്തിന്റെയും ഹാഷിം റഹ്മാന്‍ ആലപിച്ച 'സിര്‍റ്' എന്ന പേരിലുള്ള സംഗീത ആല്‍ബത്തിന്റെയും പ്രകാശനങ്ങള്‍ നടന്നു. സുധി പുത്തന്‍ വേലിക്കര 'തേന്‍ വരിക്ക' കവിതാ സമാഹാരം പരിചയപ്പെടുത്തി. ഹാഷിം റഹ്മാന്‍ നയിച്ച മെഹ്ഫില്‍ സംഗീത വിരുന്ന് പരിപാടിക്ക് മാറ്റ് കൂട്ടി. സിഞ്ചിലെ ഫ്രന്റ്‌സ് ഹാളില്‍ നടന്ന പരിപാടിയില്‍ സൗഹൃദ വേദി കണ്‍വീനര്‍ രാജു ഇരിങ്ങല്‍ അധ്യക്ഷത വഹിക്കുകയും ഗഫൂര്‍ മൂക്കുതല സ്വാഗതവും ഉമ്മു അമ്മാര്‍ നന്ദിയും പറഞ്ഞു. മുഹമ്മദ് ഷാജി പരിപാടി നിയന്ത്രിച്ചു. അബ്ബാസ് മലയില്‍, സി.വി ഇലവുപാലം, ദില്‍ഷാദ്, ഷമീമ എന്നിവര്‍ സംഗമത്തിന് നേതൃത്വം നല്‍കി.

ഫ്രന്റ് സ് റിഫ ഏരിയ സമ്മേളനം ഡിസംബര്‍ 29ന്

മനാമ: 'നന്‍മയിലേക്ക് വിജയത്തിലേക്ക്' എന്ന പ്രമേയത്തില്‍ ഫ്രന്റ്‌സ് സോഷ്യല്‍ അസോസിയേഷന്‍ റിഫ ഏരിയ സമ്മേളനം ഡിസംബര്‍ 29ന് ഇന്ത്യന്‍ സ്‌കൂളില്‍ നടത്താന്‍ കഴിഞ്ഞ ദിവസം ചേര്‍ന്ന ഏരിയ കണ്‍വെന്‍ഷന്‍ തീരുമാനിച്ചു. വെസ്റ്റ് റിഫ ദിശ ഓഡിറ്റോറിയത്തില്‍ നടന്ന കണ്‍വെന്‍ഷന്‍ അസോസിയേഷന്‍ പ്രസിഡന്റ് ജമാല്‍ ഇരിങ്ങല്‍ ഉദ്ഘാടനം ചെയ്തു. സാഹോദര്യത്തിന്റെയും മാനവികതയുടെയും സഹവര്‍ത്തിത്വത്തിന്റെയും മൂല്യങ്ങള്‍ ഒരു വശത്തും വിഭാഗീയതയുടെ ശക്തികള്‍ മറുവശത്തും നിലയുറപ്പിച്ച വര്‍ത്തമാനകാല സാഹചര്യത്തില്‍ നന്‍മയുടെ പ്രചാരരാകാനും ധാര്‍മിക മൂല്യങ്ങള്‍ സമൂഹത്തില്‍ വളര്‍ത്തിയെടുത്ത് വ്യക്തികളെയും കുടൂംബങ്ങളെയും സത്യപന്ഥാവില്‍ വഴിതെളിക്കാനും സമ്മേളനം വഴി കരുത്ത് പകരുമെന്നാണ് പ്രതീക്ഷിക്കുന്നതെന്ന് അദ്ദേഹം പറഞ്ഞു. സമ്മേളന പ്രചരണത്തിന്റെ ഭാഗമായി പ്രവാസി മലയാളികള്‍ക്കിടയില്‍ വിവിധ പരിപാടികള്‍ സംഘടിപ്പിക്കും. ടേബിള്‍ടോക്, കുട്ടികള്‍ക്കും വനിതകള്‍ക്കുമായി കവിത, ഗാന, പ്രസംഗ മല്‍സരങ്ങള്‍ എന്നിവ നടത്തും. റിഫ ഏരിയ പ്രസിഡന്റ് സാജിദ് നരിക്കുനി അധ്യക്ഷത വഹിച്ച പരിപാടിയില്‍ പി.വി അബ്ദുല്‍ മജീദ് സ്വാഗതവും അബ്ദുല്‍ ജലീല്‍ നന്ദിയും പറഞ്ഞു. മഹ്മൂദ് മാഹി, അബ്ദുല്‍ അസീസ്, സുഹൈല്‍ റഫീഖ്, ഫസലുറഹ്മാന്‍, എ. അഹ്മദ് റഫീഖ്, ഇല്‍യാസ് ശാന്തപുരം, അബ്ദുല്‍ ഹഖ്, ഷൗക്കത്തലി, ബുഷ്‌റ അഷ്‌റഫ്, സഈദ റഫീഖ്, ഷൈമില നൗഫല്‍ എന്നിവര്‍ നേതൃത്വം നല്‍കി.