റിയാദ്: കശ്മിരിലെ പ്രത്യേക അവസ്ഥ വിശകലനം ചെയ്യാന്‍ ഇസ്‌ലാമിക രാജ്യങ്ങളുടെ കൂട്ടായ്മയായ ഒ.ഐ.സി പ്രത്യേക യോഗം വിളിക്കുന്നു. സഊദി ഇടപെട്ടാണ് പ്രത്യേക യോഗം വിളിക്കുന്നത്. ഒ.ഐ.സി അംഗമായ പാകിസ്താന്റെ പ്രത്യേക ആവശ്യം മുന്‍നിര്‍ത്തിയാണ് സഊദിയുടെ ഇടപെടല്‍. സഊദി വിദേശകാര്യ മന്ത്രി ഫൈസല്‍ ബിന്‍ ഫര്‍ഹാന്റെ പാക് സന്ദര്‍ശനത്തിനിടെയാണ് ഇക്കാര്യം തീരുമാനിച്ചത്.
പാക് വിദേശകാര്യ മന്ത്രി ഷാ മഹ്മൂദ് ഖുറേഷിയെ ഉദ്ധരിച്ച് പാക് മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്. എന്നാല്‍, യോഗം വിളിക്കുന്നതിന്റെ തിയതിയോ മറ്റു കാര്യങ്ങളോ തീരുമാനിച്ചിട്ടില്ല. ഉടന്‍ തന്നെ പ്രത്യേക യോഗം ചേരുമെന്നാണ് റിപ്പോര്‍ട്ട്.
പാക് വിദേശകാര്യ മന്ത്രിയാണ് കശ്മിരിലെയും ഇന്ത്യയിലെയും സ്ഥിതിഗതികള്‍ സഊദി വിദേശകാര്യ മന്ത്രിയുടെ ശ്രദ്ധയില്‍പ്പെടുത്തിയത്.
അതേസമയം, കശ്മിര്‍ വിഷയത്തോടൊപ്പം ഇന്ത്യയില്‍ മുസ്‌ലിംകള്‍ ഇപ്പോള്‍ നേരിടുന്ന പൗരത്വ നിയമ ഭേദഗതി, എന്‍.ആര്‍.സി ഉള്‍പ്പെടെയുള്ള പ്രശ്‌നങ്ങളും ചര്‍ച്ചയായേക്കുമെന്നും റിപ്പോര്‍ട്ടുണ്ട്.