കൊല്ലം: ഒന്നേകാല്‍ കിലോ കഞ്ചാവും 80 വേദനസംഹാരി ആംപ്യൂളുമായി മധ്യവയസ്‌ക്കനെഎക്‌സൈസ് സംഘം പിടികൂടി. നാന്തരിക്കല്‍ സ്വദേശി വില്‍സനെയാണ് എക്‌സൈസ് സി.ഐയുടെ നേതൃത്വത്തില്‍ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. എക്‌സൈസ് സംഘത്തിന് ലഭിച്ച രഹസ്യവിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് കച്ചവടത്തിനായി കരുതിയിരുന്ന കഞ്ചാവും ആംപ്യൂളും പിടികൂടിയത്.
ആശുപത്രികളിലേക്ക് മാത്രം വിതരണം ചെയ്യുന്ന പ്രോമട്ടിസ് എന്ന ആംപ്യൂളാണ് പിടികൂടിയത്. ചെറിയ ലഹരിക്കായാണ് ഇത് ഉപയോഗിക്കുന്നത്. സ്‌കൂള്‍, കോളജ് വിദ്യാര്‍ഥികള്‍ക്കും ഇതരസംസ്ഥാന തൊഴിലാളികള്‍ക്കുമാണ് ഇയാള്‍ കഞ്ചാവ് വിതരണം ചെയ്യുന്നത്. വില്‍പനക്കായി പോകുമ്പോഴായിരുന്നു എക്‌സൈസ് സംഘം പ്രതിയെ പിടികൂടിയത്. നേരത്തെ നിരവധി എക്‌സസൈസ് കേസില്‍ പ്രതിയാണ് പിടിയിലായ വില്‍സന്‍. ക്രിസ്മസ്, പുതുവത്സര അഘോഷത്തിന്റെ പശ്ചാത്തലത്തില്‍ ലഹരി ഉല്‍പന്നങ്ങളുടെ കടത്ത് തടയുന്നതിനായി പരിശോധന ശക്തമാക്കിയതായി എക്‌സൈസ് സി.ഐ ഐ. നൗഷാദ് പറഞ്ഞു. പരിശോധനയില്‍ പ്രിവന്റീവ് ഓഫിസര്‍ എ. രാജു, സിവില്‍ എക്‌സൈസ് ഓഫിസര്‍മാരായ എം.ആര്‍ അനീഷ് , എവേഴ്‌സണ്‍ ലാസര്‍, ദിലീപ് കുമാര്‍, അനില്‍ എന്നിവര്‍ പങ്കെടുത്തു.