കൊല്‍ക്കത്ത:ബി.ജെ.പി മുക്ത ഭാരതമെന്ന ആശയം മുന്‍നിര്‍ത്തി ബംഗാള്‍ മുഖ്യമന്ത്രി മമതാ ബാനര്‍ജി രാജ്യവ്യാപക പ്രചാരണം തുടങ്ങി.
വിവിധ സംസ്ഥാനങ്ങളില്‍ സന്ദര്‍ശനം നടത്തി പിന്തുണ ഉറപ്പിച്ചുകൊണ്ട് പ്രക്ഷോഭം ശക്തിപ്പെടുത്താനാണ് അവര്‍ ശ്രമം തുടങ്ങിയത്. ക്വിറ്റ് ഇന്ത്യാ പ്രസ്ഥാനത്തിന്റെ 75ാം വാര്‍ഷിക ദിനത്തിലാണ് മമത ബി.ജെ.പി മുക്ത ഭാരതത്തിനായി ശ്രമം തുടങ്ങിയത്. ഇന്നലെ ബംഗാളിലെ മിഡ്‌നാപൂരിലാണ് പരിപാടിക്ക് തുടക്കം കുറിച്ചത്.
പ്രക്ഷോഭത്തിന്റെ ഭാഗമായി ഡല്‍ഹിയിലെത്തുന്ന മമത, കോണ്‍ഗ്രസ് അധ്യക്ഷ സോണിയാ ഗാന്ധിയെ സന്ദര്‍ശിക്കും.
ബിഹാറില്‍ നടക്കുന്ന റാലിയില്‍ ലാലുപ്രസാദ് യാദവിന്റെ പിന്തുണ തേടാനും മമത തീരുമാനിച്ചിട്ടുണ്ട്. ഈ മാസം 27ന് ബിഹാറിലെ പട്‌നയില്‍ ബി.ജെ.പി വിരുദ്ധ റാലി നടത്തും.
ഓഗസ്റ്റ് 30ന് ജാര്‍ഖണ്ഡ് സന്ദര്‍ശിക്കും. 2019ലെ തെരഞ്ഞെടുപ്പില്‍ ബി.ജെ.പി അധികാരത്തില്‍ കയാറാതിരിക്കുന്നതിനായി തെരഞ്ഞെടുപ്പു വരെ പ്രക്ഷോഭം തുടരാനാണ് തീരുമാനമെന്ന് മമത അറിയിച്ചു.