ധാക്ക: പൊതു തെരഞ്ഞെടുപ്പ് നടക്കാന്‍ ദിവസങ്ങള്‍ മാത്രം ബാക്കി നില്‍ക്കെ മുഖ്യ തെരഞ്ഞെടുപ്പ് കമ്മിഷണര്‍ നൂറുല്‍ ഹുദയെ മാറ്റണമെന്ന് ബംഗ്ലാദേശ് പ്രതിപക്ഷ കക്ഷികള്‍ ആവശ്യപ്പെട്ടു. കമ്മിഷണര്‍ പക്ഷപാത നടപടികള്‍ സ്വീകരിക്കുന്നെന്നാണ് പ്രതിപക്ഷമായ ബംഗ്ലാദേശ് നാഷനലിസ്റ്റ് പാര്‍ട്ടി(ബി.എന്‍.പി)-നാഷനല്‍ യൂനിറ്റ് ഫ്രണ്ട് (എന്‍.യു.എഫ് ) സഖ്യകക്ഷിയുടെ ആരോപണം.
ഞായറാഴ്ചയാണ് ബംഗ്ലാദേശില്‍ തെരഞ്ഞെടുപ്പ് നടക്കുന്നത്. തെരഞ്ഞെടുപ്പ് കമ്മിഷന്‍ വിളിച്ചുചേര്‍ത്ത യോഗത്തില്‍ നിന്ന് പ്രതിപക്ഷ പാര്‍ട്ടികള്‍ കഴിഞ്ഞ ദിവസം ഇറങ്ങിപ്പോയി.
നൂറുല്‍ ഹുദയുടെ നേതൃത്വത്തില്‍ രാജ്യത്ത് സുതാര്യമായ തെരഞ്ഞെടുപ്പ് നടത്താന്‍ സാധിക്കില്ലെന്നും അദ്ദേഹം രാജിവയ്ക്കണമെന്നും ബി.എന്‍.പി ജനറല്‍ സെക്രട്ടറി മിര്‍സ ഫക്രുല്‍ ഇസ്‌ലാം ആലംഗീര്‍ പറഞ്ഞു. തെരഞ്ഞെടുപ്പ് കമ്മിഷന്‍ നേതൃത്വത്തിലേക്ക് നിഷ്പക്ഷനായ വ്യക്തിയെ നിയമിക്കണമെന്ന്് പ്രസിഡന്റ് അബ്ദുല്‍ ഹമീദിനോട് ആവശ്യപ്പെട്ടെന്ന് അദ്ദേഹം പറഞ്ഞു.
ഡിസംബര്‍ പത്തുമുതല്‍ ആരംഭിച്ച തെരഞ്ഞെടുപ്പ് പ്രചാരണത്തിനിടെ രാജ്യത്ത് ഇതുവരെ ആറുപേര്‍ കൊല്ലപ്പെട്ടു. നൂറുകണക്കിനാളുകള്‍ക്ക് പരുക്കേറ്റു. ആക്രമണത്തിന് പിന്നില്‍ ഭരണകക്ഷിയായ അവാമി ലീഗണെന്നാണ് പ്രതിപക്ഷ ആരോപണം. പൊലിസ് പിന്തുണയോടെയുള്ള ആക്രമണങ്ങളാണ് ഭൂരിഭാഗവുമെന്ന്് മാധ്യമങ്ങള്‍ റിപ്പോര്‍ട്ട് ചെയ്തു.
തലസ്ഥാനമായ ധാക്കയില്‍ റാലി നടത്തുന്നതിന് അനുമതി നല്‍കാത്തതിനെതിരേയും പ്രതിപക്ഷം രംഗത്തെത്തി. പക്ഷപാത തീരുമാനങ്ങളാണ് പൊലിസിന്റെ ഭാഗത്തുനിന്നുണ്ടാവുന്നത്. രാജ്യത്ത് ഭയത്തിന്റെ അന്തരീക്ഷമുണ്ടാക്കാനായി 10500 പേരെ അറസ്റ്റ് ചെയ്‌തെന്നും അവര്‍ പറഞ്ഞു.