ഇരിട്ടി: തലശ്ശേരി-വളവുപാറ കെ.എസ്.ടി.പി റോഡ് നവീകരണത്തിന്റെ ഭാഗമായി ഇരിട്ടി ടൗണിലെ റോഡ് നവീകരണ പ്രവൃത്തിക്കു തുടക്കമായി. റോഡ് നിര്‍മാണ പ്രവൃത്തിയുടെ കരാര്‍ കാലാവധി തീരാന്‍ മാസങ്ങള്‍ മാത്രം ബാക്കി നില്‍ക്കെയാണു ടൗണിലെ റോഡ് നവീകരണ പ്രവൃത്തികള്‍ ആരംഭിച്ചത്. ഇതിന്റെ ഭാഗമായി ഇരിട്ടി നഗരത്തില്‍ ഇരിട്ടി പാലം മുതല്‍ പഴയ ബസ്സ്റ്റാന്‍ഡ് വരെ പുതുതായി നിര്‍മിക്കേണ്ട കലുങ്കുകളുടെ സ്ഥാനം നേരത്തെ തന്നെ നിശ്ചയിച്ചുകഴിഞ്ഞു. ഇരിട്ടി പാലം മുതല്‍ പയഞ്ചേരിമുക്ക് വരെ ഇരിട്ടി നഗരത്തില്‍ പുതിയ ഓവുചാലുകള്‍ നിര്‍മിച്ചുവേണം റോഡ് വീതി കൂട്ടാന്‍. എന്നാല്‍ ഓവുചാല്‍ നിര്‍മാണം പൂര്‍ത്തിയാകണമെങ്കില്‍ കൈയേറ്റങ്ങള്‍ പൂര്‍ണമായും ഒഴിപ്പിക്കേണ്ടിവരും. കൈയേറ്റം ഒഴിപ്പിച്ച ഭാഗങ്ങളിലെ ഓവുചാല്‍ നിര്‍മാണം ഇതിനകം ആരംഭിച്ചിരിക്കുകയാണ്.
ടൗണിലെ ഗതാഗതക്കുരുക്ക് ഒഴിവാക്കാന്‍ രാത്രികാലങ്ങളിലാണു പ്രവൃത്തി നടത്തുന്നത്. ടൗണിലെ വര്‍ഷങ്ങള്‍ പഴക്കമുള്ള ഓവുചാലുകള്‍ മാറ്റി ശാസ്ത്രീയമായ രീതിയില്‍ പുതിയ ഓവുചാലുകള്‍ നിര്‍മിക്കാനാണു റവന്യൂ ഭൂമി കൂടി പരമാവധി പ്രയോജനപ്പെടുത്തുന്നത്. ഇപ്പോള്‍ ടൗണില്‍ റോഡുകള്‍ പൊളിച്ചിട്ട ഭാഗങ്ങളില്‍ വാഹനങ്ങള്‍ പതുക്കെ പോകുന്നതിനാല്‍ ടൗണില്‍ ഗതാഗതക്കുരുക്ക് രൂക്ഷമാണ്.
ഗതാഗതക്കുരുക്കില്‍ നഗരം ശ്വാസംമുട്ടിയിട്ടും ഗതാഗതം നിയന്ത്രിക്കുവാന്‍ ഇരിട്ടി ടൗണില്‍ ട്രാഫിക് പൊലിസുകാരെ നിയോഗിക്കാന്‍ അധികൃതര്‍ ഇനിയും തയാറായിട്ടില്ല.
ഇരിട്ടി മേഖലയുടെ പല ഭാഗങ്ങളില്‍ നിന്നായി ചെങ്കല്‍കയറ്റിയ വാഹനങ്ങള്‍ ഉള്‍പ്പെടെ ടൗണിലൂടെ കടന്നുപോകുന്നതു ഗതാഗതക്കുരുക്കിനു കാരണമാവുന്നുണ്ട്. ടൗണിലെ റോഡ് നിര്‍മാണം പൂര്‍ത്തിയാകുന്നതുവരെ ഇരിട്ടി ടൗണില്‍ ഗതാഗതനിയന്ത്രണം കൊണ്ടുവരണമെന്നാണു വ്യാപാരികളും നാട്ടുകാരും ആവശ്യപ്പെടുന്നത്. ഇരിട്ടിയിലെ ഗതാഗതകുരുക്കഴിക്കാന്‍ അധികൃതരുടെ ഭാഗത്തുനിന്നു യാതൊരു നടപടിയും ഉണ്ടാകുന്നില്ലെന്ന പരാതിയും ഉയരുന്നുണ്ട്. ടൗണിലെ ഗതാഗതക്കുരുക്ക് ഒഴിവാക്കാന്‍ വലിയ വാഹനങ്ങളെ ജബ്ബാര്‍കടവ് പാലം വഴി തിരിച്ചുവിടാനും അധികൃതര്‍ക്കു സാധിക്കുന്നില്ല.