പൂക്കോട്ടുംപാടം(മലപ്പുറം): പൂക്കോട്ടുംപാടത്ത് 12ലക്ഷം രൂപയുടെ കുഴല്‍പ്പണം പിടികൂടി. ഇന്നലെ വൈകിട്ട് നാലരയോടെ പൂക്കോട്ടുംപാടം എസ്.ഐ അമൃത് രംഗനും സംഘവും നടത്തിയ വാഹന പരിശോധനയിലാണ് അമരമ്പലം സൗത്ത് പാലത്തിനു സമീപം ഇന്നോവ കാറില്‍ നിന്ന് കുഴല്‍പ്പണം കണ്ടെത്തിയത്.
കാറിന്റെ ഡാഷ് ബോക്‌സില്‍ ആറു കെട്ടുകളിലായാണ് പണം സൂക്ഷിച്ചിരുന്നത്. സംഭവത്തില്‍ കൊണ്ടോട്ടി സ്വദേശി മലാപറമ്പന്‍ മുഹമ്മദിനെ(32) പൊലിസ് പിടികൂടി. കാസര്‍കോട് രജിസ്‌ട്രേഷനിലുള്ള വാഹനത്തിലാണ് കുഴല്‍പ്പണവുമായി മുഹമ്മദ് സഞ്ചരിച്ചിരുന്നത്.
പെരിന്തല്‍മണ്ണ ഡിവൈ.എസ്.പി മോഹനചന്ദ്രന്‍, നിലമ്പൂര്‍ സി.ഐ ബിജു എന്നിവര്‍ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് പ്രതി പിടിയിലായത്. സംഘത്തിലുള്ളവരെന്നു സംശയിക്കുന്ന രണ്ടു പേരെയും ഒരു ജീപ്പും പൊലിസ് കസ്റ്റഡിയിലെടുത്തിട്ടുണ്ട്. പിടിച്ചെടുത്ത വാഹനത്തില്‍ ലഹരി പദാര്‍ഥങ്ങളെന്നു കരുതുന്ന വസ്തുക്കളും കണ്ടെത്തിയിട്ടുണ്ട്. ഇതുമായി ബന്ധപ്പെട്ട അന്വേഷണത്തിലാണ് പൊലിസ്. കൊണ്ടോട്ടി, ചോക്കാട് സ്വദേശികളായ രണ്ടു പേരാണ് ഇപ്പോള്‍ കസ്റ്റഡിയിലുള്ളതെന്നാണ് സൂചന. സിവില്‍ പൊലിസ് ഓഫിസര്‍മാരായ അന്‍സാര്‍, പി. നിബിന്‍ദാസ്, അഭിലാഷ്, വിനീഷ്, ജാഫര്‍, അനൂപ്, പങ്കജം എന്നിവരാണ് പ്രതിയെ പിടികൂടിയത്.