ഗുരുവായൂര്‍: കെ.എസ്.ആര്‍.ടി.സി ഡിപ്പോ അസി. എന്‍ജിനീയറെ ഡ്രൈവര്‍ അക്രമിച്ചതായി പരാതി.
ഗുരുവായൂര്‍ ഡിപ്പോയിലെ അസിസ്റ്റന്റ് എന്‍ജിനീയര്‍ വി.വി ഷാജുവാണ് ഡിപ്പോയിലെ തന്നെ ഡ്രൈവര്‍ എ.ആര്‍ ബാബു തന്നെ അക്രമിച്ചതായി പൊലിസില്‍ പരാതി നല്‍കിയിട്ടുള്ളത്. എ.ടി.ഒ സ്ഥലത്തില്ലാതിരുന്നതിനാല്‍ അസിസ്റ്റന്റ് എന്‍ജിനീയര്‍ക്കായിരുന്നു ശനിയാഴ്ച ഡിപ്പോയുടെ ചുമതല. സൂപ്രണ്ട് സിബി പി. ആലപ്പാട്ടിന്റെ ഓഫിസിലെത്തി ബാബു കയര്‍ക്കുന്നത് കണ്ട് ഷാജു ഇടപെടുകയായിരുന്നു.
സൂപ്രണ്ടിന്റെ ഓഫിസിലെ ക്ലര്‍ക്ക് പി. ജിജേഷിനെ കത്രിക കൊണ്ട് ആക്രമിക്കാനും ഇയാള്‍ മുതിര്‍ന്നുവത്രെ. തടയാന്‍ ശ്രമിച്ച ഷാജുവിനെ ബാബു മര്‍ദിക്കുകയായിരുന്നു. മര്‍ദനമേറ്റ ഷാജു താലൂക്ക് ആശുപത്രിയിലും തുടര്‍ന്ന് തൃശൂര്‍ മെഡിക്കല്‍ കോളജ് ആശുപത്രിലും ചികിത്സ തേടി.
സംഭവത്തെ കുറിച്ച് ഷാജുവും സിബിയും ടെമ്പിള്‍ സ്റ്റേഷനില്‍ പരാതി നല്‍കിയിട്ടുണ്ട്.
എന്നാല്‍ ഹാജരിന്റെ വിവരം തിരക്കാന്‍ ചെന്ന തന്നെ അവിടെയുണ്ടായിരുന്ന ഉദ്യോഗസ്ഥര്‍ മര്‍ദിക്കുകയായിരുന്നുവെന്ന് ബാബു പറയുന്നു.