കാബൂള്‍: മുന്‍ ഇന്ത്യന്‍ താരം ലാല്‍ചന്ദ് രജപുത് അഫ്ഗാനിസ്ഥാന്‍ ക്രിക്കറ്റ് ടീമിന്റെ പരിശീലക സ്ഥാനമൊഴിയുന്നു. രജപുതിന്റെ കരാര്‍ ഈ മാസം അവസാനിക്കാനിരിക്കേ കരാര്‍ നീട്ടേണ്ടതില്ലെന്ന് അഫ്ഗാനിസ്ഥാന്‍ ക്രിക്കറ്റ് ബോര്‍ഡ് തീരുമാനിച്ചതോടെയാണ് അദ്ദേഹം ഒഴിവാകുന്നത്.
ടീമിന് പുതിയ പരിശീലകനെ തേടാന്‍ തീരുമാനിച്ചതിനെ തുടര്‍ന്നാണ് കരാര്‍ അവസാനിപ്പിക്കാന്‍ ഒരുങ്ങുന്നതെന്ന് എ.സി.ബി വ്യക്തമാക്കി.
മുന്‍ പാകിസ്താന്‍ നായകന്‍ ഇന്‍സമാം ഉള്‍ ഹഖ് സ്ഥാനമൊഴിഞ്ഞതിന് പിന്നാലെ കഴിഞ്ഞ ജൂണിലാണ് രജപുത് അഫ്ഗാന്‍ കോച്ചായി സ്ഥാനമേറ്റത്. സ്‌കോട്‌ലന്‍ഡ്, സിംബാബ്‌വെ, അയര്‍ലന്‍ഡ് ടീമുകള്‍ക്കെതിരായ പരമ്പര വിജയങ്ങളും ടീമിന് ടെസ്റ്റ് പദവി ലഭിച്ചതും രജപുതിന്റെ പരിശീലക മികവിലായിരുന്നു.