കൊച്ചി: മാനേജ്‌മെന്റ് രംഗത്തായാലും സൈന്യത്തിലായാലും വിജയം വരിക്കാന്‍ അച്ചടക്കവും കൂട്ടായ പരിശ്രമവും ആത്മാര്‍പ്പണവും നേതൃപാടവവും അനിവാര്യമാണെന്നു കരസേനാ മുന്‍ മേധാവി ജനറല്‍ വി.പി മാലിക്. കേരള മാനേജ്‌മെന്റ് അസോസിയേഷനും (കെ.എം.എ) ഓള്‍ ഇന്ത്യ മാനേജ്‌മെന്റ് അസോസിയേഷനും കൊച്ചി ശാസ്ത്രസാങ്കേതിക സര്‍വകലാശാലയില്‍ സംഘടിപ്പിച്ച ഷെയ്പിങ് യങ് മൈന്‍ഡ്‌സ് എന്ന പരിപാടിയില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. സംസ്ഥാന സിവില്‍ സപ്ലൈസ് കോര്‍പ്പറേഷന്‍ ചെയര്‍മാനും എം.ഡിയുമായ എ.പി.എം മുഹമ്മദ് ഹനീഷ് ഉദ്ഘാടന സെഷനില്‍ മോഡറേറ്ററായിരുന്നു.
കെ.എം.എ പ്രസിഡന്റ് വിവേക് കൃഷ്ണ ഗോവിന്ദ് സ്വാഗതവും ഷെയ്പിങ് യങ് മൈന്‍ഡ്‌സ് സംഘാടക സമിതി ചെയര്‍മാന്‍ ദീപക് എല്‍. അസ്വാനി നന്ദിയും പറഞ്ഞു. കെ.എം.എ സെക്രട്ടറി ആര്‍. മാധവ് ചന്ദ്രന്‍, മെന്റര്‍ഗുരു ഡയറക്റ്റര്‍ എസ്.ആര്‍. നായര്‍, ജെജെ കണ്‍ഫെക്്ഷണറി ഡയറക്റ്റര്‍ ജേക്കബ് ജോയ്, എം.എസ്.എ. കുമാര്‍ തുടങ്ങിയവര്‍ സംബന്ധിച്ചു.