ആലുവ: ഹജ്ജ് തീര്‍ഥാടകര്‍ക്ക് സഹായ ഹസ്തമൊരുക്കി വൈദിക വിദ്യാര്‍ഥികള്‍ ഹജ്ജ് സേവന കേന്ദ്രത്തിലെത്തി. ആലുവ റെയില്‍വേ സ്‌റ്റേഷനിലെ ഹജ്ജ് സേവന കേന്ദ്രത്തിലാണ് മംഗലപുഴ പൊന്തിഫിക്കല്‍ സെമിനാരിയിലെ ഒന്നും രണ്ടും വര്‍ഷ വിദ്യാഥികളായ പ്രിന്‍സ്, ലിജു, ജഫ്രിന്‍, മെല്‍വിന്‍, ബിജു, ഷിബിന്‍, സെബി എന്നിവര്‍ ഇന്നലെയെത്തിയത്.
സംസ്ഥാനത്തിന്റെ വിവിധ ഭാഗങ്ങളില്‍നിന്ന് ട്രെയിനുകളില്‍ എത്തിയ തീര്‍ഥാടകരുടെ ബാഗുകളും മറ്റു വസ്തുക്കളുമടക്കം വൈദിക വിദ്യാര്‍ഥികളാണ് നെടുമ്പാശ്ശേരി വിമാനത്താവളത്തിലേക്കുള്ള ബസുകളിലെത്തിച്ചത്. പുണ്യഭൂമിയിലേക്കുള്ള യാത്രക്കിടെ അന്യ മതസ്ഥരായ വൈദിക വിദ്യാര്‍ഥികളുടെ സേവനം തീര്‍ഥാടകര്‍ക്ക് അനുഭൂതി പകര്‍ന്നു നല്‍കി. കൈയും മെയ്യും മറന്നുള്ള വൈദിക വിദ്യാര്‍ഥികളുടെ സേവനം സമൂഹത്തിന് മാതൃകയാകുന്നതായി.