കുന്ദമംഗലം: എന്‍.ഐ.ടി.ക്കു സമീപം 2.700 കിലോഗ്രാം കഞ്ചാവുമായി പശ്ചിമ ബംഗാള്‍ സ്വദേശി പിടിയിലായി. മുര്‍ഷിദാബാദ് സ്വദേശി ജാമിറുല്‍ ഹഖിനെയാണ് (27) ആന്റി ഗുണ്ടാവിരുദ്ധ സ്‌ക്വാഡും കുന്ദമംഗലം പൊലിസും ചേര്‍ന്നു പിടികൂടിയത്. വിദ്യാര്‍ഥികള്‍ക്കിടയില്‍ വില്‍പനയ്ക്കായി കൊണ്ടുവന്ന കഞ്ചാവാണിതെന്ന് പ്രതി പൊലിസിനോട് പറഞ്ഞു.
കട്ടാങ്ങലില്‍ വാടകക്ക് താമസിക്കുന്ന ജാമിറുല്‍ ഹഖ് ഏറെക്കാലമായി പൊലിസിന്റെ നിരീക്ഷണത്തിലായിരുന്നു.
ആസൂത്രിത നീക്കത്തിനൊടുവിലാണ് എന്‍.ഐ.ടി പരിസരത്തുനിന്ന് ഇയാളെ പിടികൂടിയത്. ഒഡിഷ്യയില്‍ നിന്നാണ് കഞ്ചാവ് എത്തിക്കുന്നതെന്ന് ഇയാള്‍ പൊലിസിനോട് പറഞ്ഞു. പ്രതിയെ വെള്ളിയാഴ്ച കോടതിയില്‍ ഹാജരാക്കും.