പാറശാല: ട്രെയിനില്‍ കടത്തിയ രണ്ട് കിലോ കഞ്ചാവുമായി പാറശാല റെയില്‍വേ സ്റ്റേഷനില്‍ മൂന്ന് യുവാക്കള്‍ പിടിയില്‍. കൊല്ലം കരുനാഗപ്പളളി താലൂക്കില്‍ കിഴക്കതില്‍ വീട്ടില്‍ കിരണ്‍ (22) , ആലപ്പുഴ ജില്ലയില്‍ ചേര്‍ത്തല താലൂക്കില്‍ സാസിക്കല്‍ വീട്ടില്‍ നെഫിന്‍ (23) , കൊല്ലം കരുനാഗപ്പളളി ഇളശ്ശേരി വീട്ടില്‍ പണ്ടാരതുരുത്തില്‍ ഗസല്‍കൃഷ്ണന്‍ (21) എന്നിവരാണ് പിടിയിലായത്.
ഇന്നലെ രാവിലെ പാറശാല റെയില്‍വേ സ്റ്റേഷനിലെത്തിയ മധുര-പുനലൂര്‍ ട്രെയിനില്‍ നിന്നുമാണ് കഞ്ചാവുമായി പ്രതികള്‍ പിടിയിലായത്. ഓപ്പണ്‍ മാര്‍ക്കറ്റില്‍ ഈ കഞ്ചാവിന് അറുപതിനായിരം രൂപ വില വരുമെന്ന് പൊലിസ് പറഞ്ഞു.
കഞ്ചാവ് മധുരയില്‍ നിന്നും ആലപ്പുഴ ബീച്ചില്‍ ചില്ലറ വില്‍പ്പനയ്ക്കായി കൊണ്ട് വന്നതായിരുന്നു.
ഓണ സീസണില്‍ ഇതര സംസ്ഥാനത്തുനിന്നും മയക്കുമരുന്ന്, ലഹരി വസ്തുക്കള്‍ എന്നിവ സംസ്ഥാനത്തേയ്ക്ക് കടത്താനുള്ള സാധ്യത ഉണ്ടെന്ന ഇന്റലിജന്‍സ് റിപ്പോര്‍ട്ടിന്റെ അടിസ്ഥാനത്തില്‍ റെയില്‍വേ പൊലിസ് സൂപ്രണ്ട് ജയമോഹനന്‍ ഐ.പി.എസ്, റെയില്‍വേ ഡിവൈ.എസ്.പി സേവ്യര്‍ സെബാസ്റ്റ്യന്‍ എന്നിവരുടെ നേതൃത്വത്തില്‍ രൂപീകരിച്ച സ്‌പെഷ്യല്‍ ഡ്രൈവ് ചെക്കിങ് ടീമില്‍പ്പെട്ട പാറശാല റെയില്‍വേ എസ്.ഐ അനില്‍കുമാര്‍, എ.എസ്.ഐ ഷിബുകുമാര്‍, സി.പി.ഒ ഷിനുജോണ്‍ എന്നിവരുടെ നേതൃത്വത്തില്‍ നടത്തിയ പരിശോധനയിലാണ് കഞ്ചാവ് പിടികൂടിയത്.