തൊടുപുഴ: വണ്ണപ്പുറം ടൗണ്‍ ലയണ്‍സ് ക്ലബിന്റെ ഉദ്ഘാടനം നാളെ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. വൈകിട്ട് ആറിന് വണ്ണപ്പുറം അറ്റ്‌ലാന്റാ കണ്‍വന്‍ഷന്‍ സെന്ററില്‍ നടക്കുന്ന ചടങ്ങില്‍ ലയണ്‍സ് ഡിസ്ട്രിക്ട് ഗവര്‍ണര്‍ അഡ്വ. എബ്രാഹം ജോണ്‍ ഉദ്ഘാടനം നിര്‍വഹിക്കും.
സര്‍വീസ് പ്രൊജക്ടുകളുടെ ഉദ്ഘാടനം ലിസി ആശുപത്രി ചാരിറ്റബിള്‍ ട്രസ്റ്റ് ഡയറക്ടര്‍ ഫാ.തോമസ് വൈക്കത്തുപറമ്പില്‍ നിര്‍വഹിക്കും. ചടങ്ങില്‍ ലയണ്‍സ് എലൈറ്റ് ക്ലബ് പ്രസിഡന്റ് ജയചന്ദ്രന്‍ നായര്‍ അധ്യക്ഷനാവും.
ഉദ്ഘാടനത്തോട് അനുബന്ധിച്ച് നിരവധി പദ്ധതികളും ആവിഷ്‌കരിച്ചിട്ടുണ്ട്. എല്ലാ ദിവസവും കൂപ്പണ്‍ മുഖേന തെരുവില്‍ ജീവിക്കുന്നവര്‍ക്ക് ഭക്ഷണം നല്‍കുന്ന സ്‌നേഹസ്പര്‍ശം പദ്ധതി, അശരണര്‍ക്ക് മരുന്നുവിതരണം, മദ്യാസക്തിക്കെതിരേ കൗണ്‍സലിങ് തുടങ്ങിയവയാണ് ഒരു വര്‍ഷം കൊണ്ട് ഏറ്റെടുക്കാന്‍ ലക്ഷ്യമിട്ടിട്ടുള്ള പദ്ധതികള്‍. വണ്ണപ്പുറം ടൗണില്‍ പത്തോളം സോളാര്‍ ലാംപുകളും സ്ഥാപിക്കുമെന്ന് ഭാരവാഹികള്‍ അറിയിച്ചു.
ഭാരവാഹികളായ ജയിംസ് ടി മാളിയേക്കല്‍, ജയചന്ദ്രന്‍ നായര്‍, റോയി ലൂക്ക്, സണ്ണിച്ചന്‍ എം സെബാസ്റ്റ്യന്‍, സുരേഷ് കുമാര്‍ വാര്‍ത്താ സമ്മേളനത്തില്‍ പങ്കെടുത്തു.