തിരൂര്‍: കൊടിഞ്ഞി ഫൈസല്‍ വധക്കേസിലെ പ്രതിയും ആര്‍.എസ്.എസ് പ്രവര്‍ത്തകനുമായ തൃപ്രങ്ങോട് കുണ്ടില്‍ ബിബിന്‍ വധക്കേസില്‍ ഒരാള്‍ കൂടി അറസ്റ്റില്‍. മറവഞ്ചേരി ഐങ്കലം കാടഞ്ചേരിയിലെ തോട്ടുപാടത്ത് മുഹമ്മദ് അഷ്‌റഫ് (49) നെയാണ് അന്വേഷണ സംഘം അറസ്റ്റ് ചെയ്തത്. ഇതോടെ കേസില്‍ ഒരു സ്ത്രീ ഉള്‍പ്പെടെ ഏഴുപേര്‍ അറസ്റ്റിലായി. അഷ്‌റഫിനെ കൊലപാതക കേസിലെ പ്രതികള്‍ക്ക് സംരക്ഷണം നല്‍കിയെന്ന കുറ്റത്തിലാണ് അറസ്റ്റ് ചെയ്തത്.
കേസില്‍ ഒന്നാം പ്രതിയുടെ ഭാര്യയെ അറസ്റ്റ് ചെയ്തതും ഗൂഢാലോചനയുടെ പേരില്‍ രണ്ട് സ്ഥാപനങ്ങളും ഒരുവീടും പൊലിസ് അടച്ചുപൂട്ടിയതും ആക്ഷേപങ്ങള്‍ക്കിടയാക്കിയിട്ടുണ്ട്.
ഫൈസല്‍ വധക്കേസിലെ ഗൂഢാലോചയില്‍ വ്യക്തമായ പങ്കുണ്ടെന്ന് അറിഞ്ഞിട്ടും അത്തരം സ്ഥാപനങ്ങള്‍ പൂട്ടാന്‍ തയാറാകാത്ത പൊലിസ് ബിബിന്‍ വധക്കേസില്‍ നേര്‍ വിപരീതമായ നിലപാടാണ് സ്വീകരിക്കുന്നതെന്ന ആക്ഷേപമാണ് ഉയരുന്നത്.