മാഹി: മാഹിയില്‍ ദേശീയപാതയോരത്തെ വിദേശമദ്യ ഷോപ്പുകള്‍ വീണ്ടും തുറന്നതിനെതിരേ മയ്യഴിക്കൂട്ടം വീണ്ടും സുപ്രിം കോടതിയിലേക്ക്. ചണ്ഡീഗഡിലെ റോഡുകള്‍ ഡീലിമിറ്റ് ചെയ്യുന്നതുമായി ബന്ധപ്പെട്ടു പുറപ്പെടുവിച്ച വിധിയിലെ ഏതാനും ചില ഭാഗങ്ങള്‍ വളച്ചൊടിച്ചു പുതുച്ചേരി എക്‌സൈസ് കമ്മിഷണര്‍ പുറപ്പെടുവിച്ച ഉത്തരവ് ദേശീയപാതയോരത്തെ മദ്യഷാപ്പുകള്‍ സംബന്ധിച്ചു നേരത്തെയുള്ള സുപ്രിം കോടതി വിധിയെ അട്ടിമറിക്കാന്‍ ഉദ്ദേശിച്ചിട്ടുള്ളതാണെന്ന നിയമോപദേശത്തിന്റെ അടിസ്ഥാനത്തിലാണ് മാഹി പ്രൊഹിബിഷന്‍ കൗണ്‍സിലിന് വേണ്ടി മയ്യഴിക്കൂട്ടം പ്രവര്‍ത്തകര്‍ പരമോന്നത നീതിപീഠത്തെ സമീപിക്കുന്നത്.
അടുത്ത ദിവസം തന്നെ സുപ്രിം കോടതിയില്‍ ഹരജി നല്‍കും. ജൂലൈ 11 ലെ വിധിയെ സംബന്ധിച്ചു പുനഃപരിശോധനാ ഹരജിയും പുതുച്ചേരി സര്‍ക്കാരിനെതിരേ കോടതി അലക്ഷ്യ ഹരജിയും സമര്‍പ്പിക്കുമെന്ന് മയ്യഴിക്കൂട്ടം ഭാരവാഹികള്‍ അറിയിച്ചു .
ജൂലൈ 11 ലെ വിധിയില്‍ രാജ്യത്തുടനീളവും ഉള്ള മുനിസിപ്പല്‍ ഏരിയയിലെ മദ്യഷാപ്പുകള്‍ തുറക്കാനാനുമതി നല്‍കിയിട്ടില്ല എന്ന് ചൂണ്ടി കാണിച്ചു മദ്രാസ് ഹൈകോടതിയില്‍ പാട്ടാളിമക്കള്‍ കക്ഷി നേതാവും ഫോറം ഫോര്‍ സോഷ്യല്‍ ജസ്റ്റിസ് നേതാവുമായ കെ.ആര്‍ ബാലു മദ്രാസ് ഹൈക്കോടതിയില്‍ ഹരജി സമര്‍പ്പിച്ചിരുന്നു.
ഈ ഹരജിയില്‍ വാദം കേട്ട കോടതി മദ്രാസ് ഹൈക്കോടതി ചീഫ് ജസ്റ്റിസ് ഇന്ദിരാ ബാനര്‍ജിയും ജസ്റ്റിസ് സുന്ദറും അടങ്ങുന്ന ഡിവിഷന്‍ ബെഞ്ച് മദിരാശി സര്‍ക്കാര്‍ ജൂലൈ 11 ലെ സുപ്രീം കോടതി വിധിയെ അടിസ്ഥാനമാക്കി ദേശീയപാതയും സംസ്ഥാനപാതയും കടന്നു പോകുന്ന മുനിസിപ്പല്‍ ഏരിയയിലെ മദ്യഷാപ്പുകള്‍ക്കു അനുമതി നല്‍കുന്നതിന് മുന്‍പ് സുപ്രീം കോടതിയോട് വിശദീകരണം ചോദിക്കേണ്ടതാണ് വ്യക്തമാക്കിയിരുന്നു. മദ്രാസ് ഹൈക്കോടതിക്കു പോലും അവ്യക്തമായ സുപ്രിം കോടതി വിധിയിലെ ചില ഭാഗങ്ങള്‍ അടര്‍ത്തിയെടുത്തു മാഹിയിലെ ദേശീയപാതയോരത്തെ 32 ഓളം മദ്യഷാപ്പുകള്‍ തുറക്കാന്‍ പുതുച്ചേരി സര്‍ക്കാര്‍ അനുമതി നല്‍കിയതോടെ സര്‍ക്കാരിന് കൂറ് മാഹിജനതയോടും അവരുടെ സൈര്യ ജീവിതത്തോടുമല്ല മദ്യമുതലാളിമാരോടും അവരുടെ താല്‍പര്യങ്ങളോടും ആണെന്ന് വ്യക്തമായതായി മയ്യഴിക്കൂട്ടം ജനറല്‍ സെക്രട്ടറി ജിനോസ് ബഷീര്‍ അറിയിച്ചു.