ന്യൂഡൽഹി: രാജ്യത്ത് 19 കിലോഗ്രാം വരുന്ന വാണിജ്യ ആവശ്യങ്ങൾക്കുള്ള എൽ.പി.ജി സിലിണ്ടർ വിലകുറച്ചു. സിലിണ്ടറിന് 183.50 രൂപയാണ് കുറച്ചത്. 5 കിലോഗ്രാമിന്റെ ഫ്രീ ട്രേഡ് എൽ.പി.ജി സിലിണ്ടറിന്റെ വില 13 രൂപയും കുറച്ചു. 

ആഭ്യന്തര സർവിസുകൾക്ക് വിമാന ഇന്ധന വിലയിൽ ലിറ്ററിന് അഞ്ചു രൂപയും കുറച്ചു. ഇതോടെ വിമാന ഇന്ധന വില ലിറ്ററിന് 110 രൂപയായി. പശ്ചിമേഷ്യയിലെ സംഘർഷത്തിൽ അയവുണ്ടായതിനു പിന്നാലെ ആഗോളവിപണിയിൽ അസംസ്‌കൃത എണ്ണ വില കുറഞ്ഞതോടെയാണ് വില കുറവ്.

പുതുക്കിയ നിരക്ക് പ്രകാരം ഡൽഹിയിൽ വാണിജ്യ സിലിണ്ടറിന്റെ വില 2,930 രൂപയാണ്. മുംബൈയിൽ 2,885.50 രൂപയും കൊൽക്കത്തയിൽ 3,081.50 രൂപയും ചെന്നൈയിൽ 3,100 രൂപയുമാണ് വില. 

എന്നാൽ, ഗാർഹിക ആവശ്യങ്ങൾക്കുള്ള 14.2 കിലോഗ്രാമിന്റെ എൽ.പി.ജി സിലിണ്ടറുകളുടെ വിലയിൽ മാറ്റമില്ല. ഈ വർഷം ഇതാദ്യമായാണ് വാണിജ്യ എൽ.പി.ജി നിരക്കുകളിൽ കുറവുണ്ടാകുന്നത്.

സ്വകാര്യ ഇന്ധന റീട്ടെയിലർ നയാര എനർജി ഇന്നലെ മുതൽ പെട്രോൾ വില ലിറ്ററിന് 5 രൂപയും ഡീസൽ വില ലിറ്ററിന് 3 രൂപയും കുറച്ചു.