തിരുവനന്തപുരം: ഒന്‍പതു വയസുകാരി ചികിത്സയിലിരിക്കെ രക്തം സ്വീകരിച്ചതിലൂടെ എച്ച്.ഐ.വി ബാധിച്ച സംഭവത്തില്‍ ഉത്തരവാദിത്വത്തില്‍ നിന്നും കൈകഴുകി തിരുവനന്തപുരം ആര്‍.സി.സി. സംഭവത്തില്‍ ആര്‍.സി.സിയ്ക്ക് വീഴ്ച പറ്റിയിട്ടില്ലെന്ന് ആര്‍.സി.സി അഡീഷണല്‍ ഡയറക്ടര്‍ ഡോ.കെ.രാംദാസിന്റെ നേതൃത്വത്തിലുള്ള ആഭ്യന്തര അന്വേഷണ സംഘം സര്‍ക്കാരിന് റിപ്പോര്‍ട്ട് നല്‍കി. സാധാരണ പരിശോധനയില്‍ അണുബാധ തിരിച്ചറിയാന്‍ കഴിയാത്ത വിന്‍ഡോ പിരിഡിലുള്ള രക്തം നല്‍കിയതാകാം രോഗബാധക്ക് കാരണമായതെന്നാണ് റിപ്പോര്‍ട്ടില്‍ പറയുന്നത്. ഇത് കണ്ടെത്താന്‍ അത്യാധുനിക പരിശോധന സംവിധാനങ്ങള്‍ ആര്‍.സി.സിയില്‍ ഇല്ലെന്നും റിപ്പോര്‍ട്ടില്‍ പറയുന്നു. ചികിത്സക്കിടെ കുട്ടിയ്ക്ക് നല്‍കിയ 49 യൂണിറ്റ് രക്ത ഘടകവും കൃത്യമായ പരിശോധനകള്‍ക്ക് വിധേയമാക്കിയിരുന്നു. മാനദണ്ഡങ്ങള്‍ പാലിച്ചുള്ള എല്ലാ പരിശോധനകളും നടത്തി രോഗബാധയില്ലെന്നും ഉറപ്പിച്ചിരുന്നു. എന്നാല്‍ രക്ത ദാദാവിന് രോഗത്തിന്റെ തുടക്ക സമയമായതിലാണ് രോഗം കണ്ടെത്താന്‍ കഴിയാത്തത്. അതിനാല്‍ രക്തം നല്‍കിയ നേഴ്‌സിനോ ഡോക്ടര്‍ക്കോ വീഴ്ച ഉണ്ടായെന്ന് പറയുവാന്‍ കഴിയില്ലെന്നും റിപ്പോര്‍ട്ടില്‍ പറയുന്നു.
വിന്‍ഡോ പീരിഡിലുള്ള രക്തമാണെങ്കില്‍ രോഗബാധ തിരിച്ചറിയാനുള്ള സംവിധാനം ആര്‍.സി.സിയില്‍ ഇല്ല . ഇതാകാം രോഗബാധയ്ക്ക് കാരണമായത്. വിഷയത്തില്‍ ആര്‍.സി.സിക്ക് സാങ്കേതികമായോ മനഃപൂര്‍വമായോ ഉള്ള പിഴവ് സംഭവിച്ചിട്ടില്ലെന്നും റിപ്പോര്‍ട്ടില്‍ പറയുന്നു. അതേസമയം വിന്‍ഡോ പീരിഡില്‍ തന്നെ രോഗബാധ കണ്ടെത്താനുതകുന്ന ന്യൂക്ലിക് ആസിഡ് പരിശോധയടക്കമുള്ള സംവിധാനങ്ങളുടെ പോരായ്മ ആര്‍.സി.സിക്ക് ഉണ്ടെന്നും റിപ്പോര്‍ട്ട് വ്യക്തമാക്കുന്നു. ദാതാവില്‍ നിന്ന് രക്തം എടുക്കുന്നത് മുതല്‍ രോഗിക്ക് നല്‍കുന്നത് വരെയുള്ള കാര്യങ്ങളില്‍ ദേശീയ എയ്ഡ്‌സ് കണ്‍ട്രോള്‍ ഓര്‍ഗനൈസേഷന്റെ മാനദണ്ഡങ്ങള്‍ ആര്‍.സി.സി പാലിക്കുന്നുണ്ട്. എന്നാല്‍, നാല് ആഴ്ച മുതല്‍ ആറ് മാസത്തിനുള്ളില്‍ വരെ രക്തദാതാവിന് എച്ച്.ഐ.വി ബാധ ഉണ്ടായിട്ടുണ്ടെങ്കില്‍ അത് കണ്ടെത്താനുള്ള സംവിധാനം ആര്‍.സി.സിയില്‍ ഇല്ല. ഇതിന് അടിയന്തരമായി പരിഹാരം കാണണം. ന്യൂക്‌ളിയര്‍ടൈഡ് ആപ്‌ളിഫിക്കേഷന്‍ ഉപയോഗിച്ച് ദാതാവിന്റെ രക്തം പരിശോധിച്ചാല്‍ എച്ച്.ഐ.വി ബാധിച്ച് രണ്ടാഴ്ച ആയിട്ടുണ്ടെങ്കില്‍ കണ്ടെത്താം. ഈ പരിശോധനയ്ക്ക് 1000 രൂപയില്‍ കൂടുതല്‍ ചെലവാകും. യന്ത്രം വാങ്ങുന്നതിന് കോടികളും വേണ്ടിവരും. സംസ്ഥാനത്ത് എറണാകുളം ഐ.എം.എ രക്തബാങ്കില്‍ മാത്രമാണ് ഈ സംവിധാനമുള്ളത്. ഇത് വലിയ പോരായ്മയാണെന്നും റിപ്പോര്‍ട്ടില്‍ പറയുന്നു.ഇത് പരിഹരിക്കപ്പെടണമെന്ന നിര്‍ദേശവും റിപ്പോര്‍ട്ടിലുണ്ട്. കുട്ടിയ്ക്ക് രക്തം നലകിയ 49 പേരുടെ രക്ത സാമ്പിളുകള്‍ വീണ്ടും പരിശോധിയ്ക്കണമെന്നും റിപ്പോര്‍ട്ടില്‍ ആവശ്യപ്പെട്ടിട്ടുണ്ട്. കഴിഞ്ഞ ദിവസം എയ്ഡ്‌സ് കണ്‍ട്രോളള്‍ സൊസൈറ്റിയും ആര്‍.സി.സിയ്ക്ക് ക്ലീന്‍ ചീറ്റ് നല്‍കിയ റിപ്പോര്‍ട്ടാണ് നല്‍കിയത്. ഇതിനിടെ സര്‍ക്കാര്‍ നിയോഗിച്ച വിധഗ്ദ സമിതിയുടെ അന്വേഷണവും അന്തിമ ഘട്ടത്തിലാണ്. ഇന്നോ നാളെയോ റിപ്പോര്‍ട്ട് നല്‍കും. സമാന്തരമായി പൊലിസ് അന്വേഷണവും നടക്കുന്നുണ്ട്. മെഡിക്കല്‍ കോളജ് സി.ഐയുടെ നേതൃത്വത്തിലുള്ള സംഘമാണ് അന്വേഷിക്കുന്നത്. മാതാപിതാക്കളുടെ പരാതിയെ തുടര്‍ന്ന് കുട്ടിയുടെ പരിശോധന രേഖകളും രക്തം നല്‍കിയവരുടെ ലിസ്റ്റും പൊലിസ് പരിശോധിച്ചിരുന്നു. രക്താര്‍ബുദ ചികിത്സക്കായാണ് കുട്ടിയെ തിരുവനന്തപുരം ആര്‍.സി.സിയില്‍ പ്രവേശിപ്പിച്ചത്. ചികില്‍സയ്ക്കിടയില്‍ പല തവണ ആര്‍.സി.സിയില്‍ നിന്നും രക്തം സ്വീകരിച്ച കുട്ടിക്ക് ഓഗസ്റ്റ് 25ന് നടന്ന രക്തപരിശോധനയിലാണ് എച്ച്.ഐവി ബാധയുണ്ടെന്ന് കണ്ടെത്തിയത്.