തിരുവനന്തപുരം: തമിഴ്‌നാട് സ്വദേശി മുരുകന്‍ ചികില്‍സ കിട്ടാതെ മരിച്ച സംഭവത്തില്‍ തിരുവനന്തപുരം മെഡിക്കല്‍ കോളജ് ആശുപത്രിക്ക് വീഴ്ച സംഭവിച്ചെന്ന് പൊലിസ് മനുഷ്യാവകാശ കമ്മിഷന് റിപ്പോര്‍ട്ട് നല്‍കി. 

മുരുകന്റെ ജീവന്‍ രക്ഷിക്കാന്‍ വേണ്ട ഒരു നടപടികളും മെഡിക്കല്‍ കോളജ് അധികൃതരുടെ ഭാഗത്തു നിന്ന് ഉണ്ടായിട്ടില്ലെന്നും ഡോക്ടര്‍മാര്‍ അവരുടെ ഉത്തരവാദിത്തം നിര്‍വഹിച്ചിരുന്നെങ്കില്‍ മുരുകന് ജീവന്‍ നഷ്ടപ്പെടില്ലായിരുന്നുവെന്നും റിപ്പോര്‍ട്ടില്‍ പറയുന്നു.
ഗുരുതരാവസ്ഥയിലായിരുന്ന മുരുകനെ ചികില്‍സിക്കാന്‍ പി.ജി ഡോക്ടറെ അയച്ചത് ഗുരുതര വീഴ്ചയാണ്. ഡോക്ടര്‍മാര്‍ അന്വേഷണത്തോട് സഹകരിക്കുന്നില്ലെന്നും വെന്റിലേറ്ററുകളുടെ കൃത്യമായ കണക്ക് നല്‍കുന്നില്ലെന്നും പൊലിസ് നല്‍കിയ റിപ്പോര്‍ട്ടില്‍ പറയുന്നു.