ന്യൂഡല്‍ഹി: ജി.എസ്.ടി തെറ്റായരീതിയിലാണ് നടപ്പാക്കിയതെന്ന് മുന്‍പ്രധാനമന്ത്രി മന്‍മോഹന്‍ സിങ്. തെറ്റായ രീതിയിലാണ് ഇത് തയാറാക്കിയതെന്നും ഇതിന്റെ സങ്കീര്‍ണത കാരണം തൊഴില്‍ മേഖലയെയും വ്യാപാരമേഖലയെയും സങ്കീര്‍ണമായ അവസ്ഥയിലേക്കാണ് എത്തിച്ചതെന്നും അദ്ദേഹം ആരോപിച്ചു.
കോണ്‍ഗ്രസ് ആസ്ഥാനത്ത് ജി.എസ്.ടിയുമായി ബന്ധപ്പെട്ട പ്രശ്‌നത്തെക്കുറിച്ചുള്ള യോഗത്തില്‍ സംസാരിക്കുകയായിരുന്നു അദ്ദേഹം.
നോട്ടുനിരോധനമെന്നത് സംഘടിതമായ കൊള്ളയും നിയമാനുസൃതമായ പിടിച്ചുപറിയുമായിരുന്നു. സാധാരണക്കാരായ ജനങ്ങളുടെ ജീവിതനിലവാരത്തിന് ജി.എസ്.ടി പ്രതികൂലമായ അവസ്ഥയാണ് ഉണ്ടാക്കിയത്.
അതുകൂടാതെ രാജ്യത്തെ വ്യാപാര മേഖലയെ അത് തകര്‍ക്കുകയും ചെയ്തുവെന്നും മന്‍മോഹന്‍ സിങ് കുറ്റപ്പെടുത്തി.
യോഗത്തില്‍ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി, പി. ചിദംബരം, ജെയ്‌റാം രമേശ്, കോണ്‍ഗ്രസ് ഭരിക്കുന്ന സംസ്ഥാനങ്ങളിലെ ധനമന്ത്രിമാര്‍ എന്നിവരും സംബന്ധിച്ചു.