നെടുമ്പാശ്ശേരി: നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ പിടികൂടിയത് 15 കോടി രൂപ മൂല്യമുള്ള മയക്കുമരുന്ന്. ഇതുമായി ബന്ധപ്പെട്ട് പരാഗ്വേ സ്വദേശിയായ അലക്‌സിറ്റയാള്‍ഡ ഫെര്‍ണാണ്ടസിനെ(30) ഞായറാഴ്ച്ച രാത്രി വിമാനത്താവളത്തില്‍ പിടിയിലായിരുന്നു. മൂന്നര കിലോഗ്രാം കൊക്കെയിനാണ് ഇയാളില്‍ നിന്നും പിടികൂടിയത്. നാര്‍കോട്ടിക് കണ്‍ട്രോള്‍ ബ്യുറോ (എന്‍.സി.ബി)ക്ക് കൈമാറിയ പ്രതിയെ വിശദമായി ചോദ്യം ചെയ്ത് വരികയാണ്. ഇംഗ്ലീഷ് ഭാഷ വശമില്ലാത്ത ഇയാളെ സ്പാനിഷ് ഭാഷ അറിയുന്ന ദ്വിഭാഷിയുടെ സഹായത്തോടെയാണ് ചോദ്യം ചെയ്യുന്നത്. സി.ഐ.എസ്.എഫ് വിഭാഗത്തിന്റെ പിടിയിലായ ഇയാള്‍ രാജ്യാന്തര മയക്കുമരുന്ന് മാഫിയ സംഘത്തിലെ കണ്ണിയാണെന്ന് സംശയിക്കുന്നു.
ഞായറാഴ്ച്ച രാവിലെയാണ് ബ്രസീലില്‍ നിന്നും ദുബൈ വഴി എമിറേറ്റ്‌സ് വിമാനത്തില്‍ ഇയാള്‍ നെടുമ്പാശ്ശേരിയിലെത്തിയത്. ഇയാള്‍ മയക്കുമരുന്ന് ശരീരത്തില്‍ കെട്ടിവച്ചിരിക്കുകയായിരുന്നു. ബ്രസീലില്‍ നിന്നാണ് കൊകെയിന്‍ എത്തിച്ചതെന്നാണ് ചോദ്യം ചെയ്യലില്‍ ഇയാള്‍ വ്യക്തമാക്കിയത്. ഗോവ കേന്ദ്രീകരിച്ച് മയക്കുമരുന്ന് വിപണനം നടത്തുന്ന സംഘത്തിലെ പ്രധാന കണ്ണിയാണ് ഇയാള്‍.