ന്യൂഡല്‍ഹി:നിയമം ലംഘിച്ച് സംഭാവന സ്വീകരിച്ചുവെന്ന് ചൂണ്ടിക്കാട്ടി ആം ആദ്മി പാര്‍ട്ടിക്ക് ആദായ നികുതി വകുപ്പിന്റെ നോട്ടിസ്. നിയമ ലംഘനം നടത്തിയ സാഹചര്യത്തില്‍ 30.67 കോടി രൂപ പിഴയടക്കണമെന്നാണ് ഐ.ടി വകുപ്പ് നല്‍കിയ നോട്ടിസില്‍ അറിയിച്ചത്. ഡിസംബര്‍ എഴിന് മുന്‍പായി ഇതുസംബന്ധിച്ച വിശദീകരണം നല്‍കണമെന്നും നോട്ടിസില്‍ പറഞ്ഞിട്ടുണ്ട്.
2014-15 വര്‍ഷങ്ങളില്‍ ആംആദ്മി പാര്‍ട്ടിക്ക് ലഭിച്ച സംഭാവനകളാണ് ഐ.ടി വകുപ്പ് പരിശോധിച്ചത്. എന്നാല്‍ സംഭാവനയില്‍ നിരവധി ക്രമക്കേടുകളുണ്ടായതായി കണ്ടെത്തിയിട്ടുണ്ട്.
ഈ സാഹചര്യത്തിലാണ് പിഴയടക്കണമെന്ന് ആവശ്യപ്പെട്ടതെന്നാണ് ഐ.ടി ഉദ്യോഗസ്ഥര്‍ വ്യക്തമാക്കിയത്.
അതേസമയം മോദി സര്‍ക്കാരിന്റ ആസൂത്രിതമായ നീക്കമാണ് ഇത്തരത്തിലൊരു നടപടിക്കു പിന്നിലുള്ളതെന്ന് ആംആദ്മി നേതാക്കള്‍ ആരോപിച്ചു. ചരിത്രത്തില്‍ ആദ്യമായിട്ടാണ് ഒരു രാഷ്ട്രീയ പാര്‍ട്ടിക്ക് സംഭാവന ലഭിച്ച പണത്തിന് പിഴ നല്‍കണമെന്ന് ആവശ്യപ്പെടുന്നത്. നോട്ടിസിനെ നിയമപരമായി നേരിടാനാണ് എ.എ.പിയുടെ തീരുമാനം.