തൃശൂര്‍: സംസ്ഥാന സ്‌കൂള്‍ കലോത്സവത്തിന്റെ പന്തല്‍ കാല്‍നാട്ടല്‍ കര്‍മം മുഖ്യവേദിയായ തേക്കിന്‍കാട് മൈതാനത്ത് നടന്നു. കിഴക്കേനടയിലെ പൂരം പ്രദര്‍ശന നഗരിയില്‍ മന്ത്രി വി.എസ്. സുനില്‍കുമാര്‍ ഉദ്ഘാടനം ചെയ്തു.
സാംസ്‌കാരിക തലസ്ഥാനത്തിന്റെ പ്രൗഢിക്കനുസരിച്ച് കലോത്സവത്തെ പൊതുജനാവലി ഏറ്റെടുത്തു കഴിഞ്ഞതായി അദ്ദേഹം പറഞ്ഞു. തേക്കിന്‍കാട് മൈതാനത്ത് മൂന്ന് വേദികളാണ് ഒരുക്കുന്നത്. കിഴക്കേനടയിലെ പ്രധാനവേദി 4000 സ്‌ക്വയര്‍ ഫീറ്റിലാണ് നിര്‍മിക്കുന്നത്. തെക്കേ ഗോപുര നടയിലും നായ്ക്കനാലിലുമാണ് രണ്ട് വേദികള്‍. കലോത്സവ എക്‌സിബിഷന്‍ മുഖ്യവേദിയുടെ സമീപത്തായി സജ്ജീകരിക്കും. മീഡിയ സെന്ററും ഇവിടെയായിരിക്കും. ദൃശ്യ, പത്ര സ്ഥാപനങ്ങള്‍ക്കായി 50 സ്്റ്റാളുകളാണ് ഒരുക്കുന്നത്. മേയര്‍ അജിത ജയരാജന്‍ അധ്യക്ഷയായി. പി.കെ. ബിജു എം.പി, എം.എല്‍.എമാരായ അനില്‍ അക്കര, കെ രാജന്‍, കെ.വി അബ്ദുല്‍ ഖാദര്‍, ഡി.ഡി കെ സുമതി, വകുപ്പ് ഉദ്യോഗസ്ഥര്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു.