അബ്ദുസ്സലാം കൂടരഞ്ഞി
മക്ക
സഊദിയിൽ കൊവിഡ് നിയന്ത്രണങ്ങൾ പിൻവലിച്ചതിനു ശേഷമുള്ള ആദ്യ വെള്ളിയാഴ്ച ഇരുഹറമുകളും നിറഞ്ഞു. തോളോടുതോൾ ചേർന്ന് സ്വഫുകൾ ചേർന്ന് വിശ്വാസികൾ അണിനിരന്നപ്പോൾ ഹറം പള്ളികൾ പഴയ പ്രതാപം വീണ്ടെടുക്കുകയായിരുന്നു. രണ്ട് വർഷത്തെ ഇടവേളയ്ക്കു ശേഷമാണ് വിശ്വാസികൾ സാമൂഹിക അകലം പാലിക്കാതെയും ഹറമിൽ നിറഞ്ഞും ഉംറ നിർവഹിക്കുന്നതും ജുമുഅ നിസ്കാരത്തിലും മറ്റു പ്രാർഥനകളിലും പങ്കെടുക്കുന്നതും.
കഴിഞ്ഞ ശനിയാഴ്ചയാണ് സഊദിയിൽ കൊവിഡ് നിയന്ത്രണങ്ങൾ ആഭ്യന്തര മന്ത്രാലയം പിൻവലിച്ചത്. പള്ളികളിലെ നിസ്കാരങ്ങളിലെ അകലം പാലിക്കുന്നത് അടക്കമുള്ള നിയന്ത്രണങ്ങളായിരുന്നു പിൻവലിച്ചത്. ഇതേതുടർന്ന് ഹറമുകളിലേക്കുള്ള പ്രവേശനത്തിനുള്ള നിയന്ത്രണങ്ങളും ഹറം കാര്യാലയം പിൻവലിക്കുകയായിരുന്നു.