കോട്ടയ്ക്കല്‍: നേത്രഗോളത്തിനു ക്ഷതം സംഭവിച്ചു കണ്ണുതുറക്കാന്‍പോലും പ്രയാസത്തിലായ 40കാരിയുടെ മുഖത്തു പാടുണ്ടാകാത്ത രീതിയില്‍  കോട്ടയ്ക്കല്‍ ആസ്റ്റര്‍ മിംസില്‍ നൂതനമായ ശസ്ത്രക്രിയ നടത്തി. കാറില്‍യാത്ര ചെയ്യുമ്പോള്‍ മുഖത്ത് എന്തോ വന്നിടിച്ചു എന്നതുമാത്രമാണു രോഗിക്ക് ഓര്‍മയുണ്ടായിരുന്നത്. തുടര്‍ന്നു നീരുവന്ന് വീര്‍ത്തതുമൂലം കണ്ണു തുറക്കാന്‍ കഴിയുമായിരുന്നില്ല. പ്രാഥമിക ശുശ്രൂഷകള്‍ക്കു ശേഷംവിദഗ്ധ പരിശോധനയ്ക്കായാണു വീട്ടമ്മയെ കോട്ടയ്ക്കല്‍ ആസ്റ്റര്‍ മിംസില്‍ പ്രവേശിപ്പിച്ചത്.
വിശദമായ പരിശോധനയില്‍ നേത്രഗോളത്തിനു ക്ഷതമുണ്ടെന്നു കണ്ടെത്തി.  വിദഗ്ധ പരിശോധനയില്‍ റേഡിയോളജിസ്റ്റ് ഡോ. ആവ്‌നി കെ. പി. സ്‌കന്ദന്‍ ഓര്‍ബിറ്റല്‍ ബ്ലോഔട്ട് ഫ്രാക്ചര്‍ ആണെന്നു കണ്ടെത്തി. നേരിട്ടുള്ള ഇടിയോ സമ്മര്‍ദ്ദമോ മൂലം കണ്‍തടത്തില്‍ പൊട്ടലുണ്ടാകുന്ന വേദനാജനകമായ അവസ്ഥയാണ് ഓര്‍ബിറ്റല്‍ബ്ലോഔട്ട് ഫ്രാക്ചര്‍. സീനിയര്‍ കണ്‍സള്‍ട്ടന്റ് ന്യൂറോസര്‍ജന്‍ ഡോ. കെ.ആര്‍. ഷാജിയുടെ നേതൃത്വത്തില്‍ തലയിലെ മുറിവുകള്‍ക്ക് ചികിത്സ തുടങ്ങി. നേസല്‍ എന്‍ഡോസ്‌കോപ്പി ഉപയോഗിച്ചു നേത്രഗോളങ്ങള്‍ കണ്‍തടത്തിനുള്ളിലേയ്ക്കു കയറ്റിവച്ചു. ഓര്‍ബിറ്റല്‍ എല്ലിനുണ്ടായ തകരാര്‍ മാറ്റുന്നതിനു സെപ്റ്റല്‍ തരുണാസ്ഥിയുടെ ഒരു ഭാഗം ഉപയോഗിച്ചെന്നു ശസ്ത്രക്രിയയ്ക്കുനേതൃത്വം നല്‍കിയ ഡോ. അബ്ദുള്‍ അസീസ് പറഞ്ഞു. കാര്യമായ പ്രശ്‌നങ്ങളുണ്ടാക്കാതെ ആരോഗ്യംവീണ്ടെടുത്ത മല്ലിക മൂന്നു ദിവസത്തിനുശേഷം ആശുപത്രി വിട്ടു. കണ്ണുകളുടെ ചലനവും കാഴ്ചയും സാധാരണ രീതിയിലായി.