പ്രസവ വേദന കടിച്ചമര്‍ത്തി തന്റെ പ്രിയപ്പെട്ടവര്‍ക്കൊപ്പം ആശുപത്രിയിലേക്ക് പോകുമ്പോഴാണ് വിധി ഗര്‍ഭസ്ഥശിശുവടക്കം മൂന്നുപേരേയും തട്ടിയെടുത്തത്. തന്റെ കുഞ്ഞിനായ് നാളുകളെണ്ണി കാത്തിരുന്നവര്‍ക്ക് തീരാവേദന സമ്മാനിച്ച ദിവസം.

കണ്ണൂരില്‍ ഓടുന്ന കാറിന് തീപിടിച്ച് പൂര്‍ണഗര്‍ഭിണിയും ഭര്‍ത്താവും മരിച്ച സംഭവത്തിന്റെ ഞെട്ടല്‍ മാറാതെയാണ് ദൃക്‌സാക്ഷികള്‍. കാറിന്റെ മുന്‍വശം കത്തിയമരുമ്പോഴും രക്ഷിക്കണേയെന്ന് കൈ ഉയര്‍ത്തി നിലവിളിച്ചതായി ദൃക്‌സാക്ഷികള്‍ പറയുന്നു. പക്ഷേ നിസ്സഹായരായി നോക്കി നില്‍ക്കാന്‍ മാത്രമാണ് ദൃക്‌സാക്ഷികള്‍ക്ക് കഴിഞ്ഞത്. ഡോര്‍ ജാമായതിനാല്‍ വാഹനത്തിലുണ്ടായിരുന്നവര്‍ക്ക് പുറത്തിറങ്ങാനായില്ല. ഇതോടെ കാര്‍ ഓടിച്ച പ്രജിത്തും ഭാര്യ റീഷയും അഗ്നിക്കിരയാവുകയായിരുന്നു.

തീ പടരുന്നതിനിടെ പ്രജിത്ത് പുറകിലെ ഡോര്‍ തുറന്നു. ഇതുവഴിയാണ് ബാക്ക് സീറ്റിലുണ്ടായിരുന്ന ഒരു കുട്ടിയടക്കം നാല് പേര്‍ രക്ഷപ്പെട്ടത്. എന്നാല്‍ മുന്‍ വശത്തെ ഡോര്‍ തുറക്കാനായില്ല. അപ്പോഴേക്കും തീ കൂടുതല്‍ പടര്‍ന്ന് പിടിച്ചിരുന്നു. രക്ഷപ്പെട്ടവരെ ആശുപത്രിയിലെത്തിച്ചു. സംഭവം നടന്നതിന് നൂറ് മീറ്ററോളം മാറി ഫയര്‍ സ്റ്റേഷനുണ്ടായിരുന്നുവെങ്കിലും രണ്ട് പേരെയും രക്ഷിക്കാന്‍ കഴിഞ്ഞില്ല. പിന്നിലെത്തിയ ബൈക്ക് യാത്രക്കാരാണ് സംഭവം ആദ്യമായി കാണുന്നത്.