കഴിഞ്ഞ മത്സരത്തില്‍ ഗുജറാത്ത് ടൈറ്റന്‍സിനെതിരെ കുറഞ്ഞ ഓവര്‍ നിരക്കില്‍ രാജസ്ഥാന്‍ റോയല്‍സ് നായകന്‍ സഞ്ജു സാംസണ് പിഴശിക്ഷ വിധിച്ച് ബിസിസിഐ. 12 ലക്ഷം രൂപയാണ് പിഴയിനത്തില്‍ സഞ്ജു അടക്കേണ്ടത്. ടൂര്‍ണമെന്റില്‍ ഗുജറാത്ത് ടൈറ്റന്‍സിന്റെ ശുഭ്മാന്‍ ഗില്ലിനും ഡല്‍ഹി ക്യാപിറ്റല്‍സ് നായകന്‍ റിഷഭ് പന്തിനും സമാനമായ രീതിയില്‍ പിഴ ലഭിച്ചിരുന്നു. കുറഞ്ഞ ഓവര്‍ നിരക്കിന്റെ പേരില്‍ തന്നെയാണ് ഇരുവര്‍ക്കും പിഴ ലഭിച്ചത്.

കുറ്റം വീണ്ടും ആവര്‍ത്തിക്കുകയാണെങ്കില്‍ ഒരു മത്സരത്തില്‍ പുറത്തിരിക്കേണ്ടി വരും. ബിസിസിഐ കളി നിയമപ്രകാരം ആദ്യ തെറ്റിന് 12 ലക്ഷം പിഴയും രണ്ട് തവണ ആവര്‍ത്തിച്ചാല്‍ പുറത്തിരിക്കുകയോ ആണ് വേണ്ടത്. കൂടാതെ ടീമിലെ മുഴുവന്‍ അംഗങ്ങളും പിഴയൊടുക്കേണ്ടതായി വരും. ക്യാപ്റ്റന്റെ പിഴത്തുക 24 ലക്ഷമായി ഉയരുകയും ചെയ്യും. മൂന്നാം വട്ടവും ആവര്‍ത്തിച്ചാല്‍  30 ലക്ഷം ഒടുക്കേണ്ടി വരും.

അതേസമയം മത്സരത്തില്‍ രാജസ്ഥാന്‍ റോയല്‍സ് പരാജയപ്പെടുകയാണുണ്ടായത്. രാജസ്ഥാന്‍ ഉയര്‍ത്തിയ 197 റണ്‍സ് വിജയലക്ഷ്യം ആവേശം നിറഞ്ഞ അവസാന പന്തില്‍ ഗുജറാത്ത് മറികടക്കുകയായിരുന്നു.