ഷാർജ: ഭിക്ഷാടനത്തിനെതിരെ നടപടികൾ ശക്തമാക്കി ഷാർജ. റമദാൻ മാസത്തിൽ ഭിക്ഷാടനം നടത്തിയതിന് ഇതുവരെ 119 യാചകരെ പൊലിസ് അറസ്റ്റ് ചെയ്തു. റമദാൻ ആദ്യ 15 ദിവസങ്ങൾ പിന്നിട്ടപ്പോഴേക്കും ഇത്രയധികം പിടികൂടിയതോടെ നടപടികൾ കൂടുതൽ കടുപ്പിക്കാനുള്ള ശ്രമത്തിലാണ് അധികൃതർ. ഇതിന്റെ ഭാഗമായി പൊതുജനങ്ങളോട് ഭിക്ഷാടകരെ കണ്ടാൽ ഹോട്ട്‌ലൈൻ നമ്പറുകളിൽ അറിയിക്കാൻ പൊലിസ് നിർദേശം നൽകിയിട്ടുണ്ട്.

അറസ്റ്റിലായവരിൽ 109 പേർ പുരുഷന്മാരും 10 പേർ സ്ത്രീകളുമാണ്. ഇവരിൽ നിന്നായി ആകെ 33,000 ദിർഹം കണ്ടെത്തിയതായി ഷാർജ പൊലിസ് മീഡിയ ആൻഡ് പബ്ലിക് റിലേഷൻസ് വകുപ്പ് ഡയറക്ടർ ജനറൽ ആരിഫ് ബിൻ ഹുദൈബ് പറഞ്ഞു. മിക്ക യാചകരും എളുപ്പത്തിൽ പണം സമ്പാദിക്കാൻ വിശ്വാസികളുടെ മതപരവും ജീവകാരുണ്യവുമായ വികാരങ്ങള്‍ ചൂഷണം ചെയ്യുന്നതായി അദ്ദേഹം വ്യക്തമാക്കി. ഭിക്ഷാടനത്തിനെതിരെ ഷാർജ പൊലിസ് റമദാൻ ആദ്യ ദിനം മുതൽ ക്യാംപെയ്ൻ നടത്തുന്നുണ്ട്.

ഭിക്ഷാടനം പൂർണമായി നിർത്തലാക്കാൻ അധികൃതർ പൊതുജനങ്ങളുടെ സഹകരണം ആവശ്യപ്പെട്ടിട്ടുണ്ട്. 80040, 901 നമ്പറുകളിലൂ പൊലിസിനെ വിവരം അറിയിക്കാവുന്നതാണ്. പൊലീസ് വെബ്‌സൈറ്റുകളിൽ ലഭ്യമായ ‘ഗാർഡ്’ സേവനത്തിലൂടെയും എമിറേറ്റിലെ റോഡുകളിൽ പട്രോളിങ് നടത്തുന്ന കൺട്രോൾ ടീമുകളുടെ ഫീൽഡ് ക്യാംപെയ്നിലും ഭിക്ഷാടനം റിപ്പോർട്ട് ചെയ്യാവുന്നതാണ്.

കൂടുതല്‍ ഗള്‍ഫ് വാര്‍ത്തകള്‍ ലഭിക്കാന്‍ സുപ്രഭാതം വാട്‌സാപ്പ് കമ്യൂണിറ്റിയില്‍ ജോയിന്‍ ചെയ്യുക: https://chat.whatsapp.com/HVpI8bKnwZA7O8fvza77sv