കോഴിക്കോട്: എലത്തൂര്‍ ട്രെയിന്‍ തീവെപ്പ് കേസിലെ പ്രതി കുറ്റം സമ്മതിച്ചെന്ന് എഡിജിപി എം.ആര്‍.അജിത് കുമാര്‍. അന്വേഷണം പ്രാഥമിക ഘട്ടത്തിലെന്ന് എഡിജിപി. തീവെച്ചത് താനാണെന്ന് പ്രതി സമ്മതിച്ചിട്ടുണ്ട്. ട്രാക്കില്‍ കണ്ടെത്തിയ ബാഗിലെ ഡയറിയിലുള്ളത് പ്രതിയുടെ കൈയക്ഷരം തന്നെയാണ്. പ്രതി പൂര്‍ണ ആരോഗ്യവാന്‍, ചോദ്യം ചെയ്യാന്‍ തടസങ്ങളില്ല. കേസ് തെളിയിക്കാന്‍ ആവശ്യമായ തെളിവെടുപ്പുകള്‍ നടത്തുമെന്ന് എഡിജിപി പറഞ്ഞു.

എലത്തൂര്‍ ട്രെയിന്‍ തീവയ്പ് കേസിലെ പ്രതി ഷാറൂഖ് സെയ്ഫിയെ ഈ മാസം 18 വരെ പൊലീസ് കസ്റ്റഡിയില്‍ വിട്ടു. മാലൂര്‍കുന്ന് പൊലീസ് ക്യാംപില്‍ പ്രതിയെ ചോദ്യം ചെയ്ത് തുടങ്ങി. മൂന്നു പേരുടെ മരണത്തില്‍ പ്രതിക്കെതിരെ കൊലകുറ്റം ചുമത്തിയെങ്കിലും യു എ പി എ ചേര്‍ത്തിട്ടില്ല. മജിസ്‌ട്രേറ്റ് കോഴിക്കോട് മെഡിക്കല്‍ കോളജില്‍ നേരിട്ടെത്തി മൊഴിയെടുത്താണ് പ്രതിയെ റിമാന്‍ഡ് ചെയ്തത്. പിന്നീട് 11 ദിവസം കസ്റ്റഡിയില്‍ വിട്ടു നല്‍കുകയായിരുന്നു.

ട്രെയിന്‍ തീവെപ്പിനിടെ ട്രാക്കില്‍ വീണുമരിച്ച മൂന്നുപേരുടെ മരണത്തില്‍ പങ്കുണ്ടെന്ന കണ്ടെത്തലിനെ തുടര്‍ന്നാണ് കൊലക്കുറ്റം ചുമത്തിയിരിക്കുന്നത്. എന്നാല്‍ പ്രതിക്കെതിരെ യു.എ.പി.എ ചുമത്തുന്ന കാര്യത്തില്‍ തീരുമാനമായിട്ടില്ല. കണ്ണൂര്‍ മട്ടന്നൂര്‍ സ്വദേശി റഹ്മത്ത്,സഹോദരിയുടെ മകള്‍ രണ്ടരവയസുകാരി സഹ്‌റ, കണ്ണൂര്‍ സ്വദേശി നൗഫിക്ക് എന്നിവരാണ് മരിച്ചത്.തീ പടരുന്ന് കണ്ട് ട്രാക്കിലേക്ക് എടുത്തു ചാടിയെന്നാണ് കരുതുന്നത്.