കോഴിക്കോട്: ഹീറോ സൂപ്പര്‍ കപ്പ് ഫുട്‌ബോള്‍ ടൂര്‍ണമെന്റിന് നാളെ കോഴിക്കോട് കോര്‍പറേഷന്‍ സ്റ്റേഡിയത്ത് തുടക്കം. വൈകിട്ട് അഞ്ചിന് ഐ.എസ്.എല്‍ ക്ലബ് ബംഗളൂരു എഫ്.സിയും ഐ ലീഗ് ക്ലബ് ശ്രീനിധി ഡക്കാനും തമ്മില്‍ ഉദ്ഘാടന മത്സരം കളിക്കും. രാത്രി 8.30ന് കേരള ടീം കേരള ബ്ലാസ്‌റ്റേഴ്‌സ് കളത്തിലിറങ്ങുന്നുണ്ട്. നിലവിലെ ഐ ലീഗ് ചാംപ്യന്‍മാരായ റൗണ്ട് ഗ്ലാസ് പഞ്ചാബുമായാണ് ബ്ലാസ്റ്റേഴ്‌സിന്റെ മത്സരം.

ഇത്തവണ നാല് ഗ്രൂപ്പുകളിലായി 16 ടീമുകളാണ് സൂപ്പര്‍ കപ്പ് കിരീടത്തിനു വേണ്ടി മത്സരിക്കുന്നത്. ഇതില്‍ 11 ഐ.എസ്.എല്‍ ടീമും നിലവിലെ ഐ ലീഗ് ചാംപ്യന്‍മാരായ റൗണ്ട് ഗ്ലാസ് പഞ്ചാബും നേരത്തേ യോഗ്യത ഉറപ്പിച്ച ഫൈനല്‍ റൗണ്ടില്‍ ഗോകുലം കേരള ഉള്‍പ്പെടെ യോഗ്യതാ മത്സരം കളിച്ചെത്തിയ നാല് ടീമും ഇടം കണ്ടെത്തി. 17 ദിവസം നീണ്ടു നില്‍ക്കുന്ന ടൂര്‍ണമെന്റ് കായിക മന്ത്രി അബ്ദുറഹ്മാന്‍ ഉദ്ഘാടനം ചെയ്യും. മൂന്നു ദിവസമായി മഞ്ചേരിയില്‍ നടന്ന യോഗ്യത മത്സരത്തിന് ശേഷമാണ് ഗ്രൂപ്പ് ഘട്ട മത്സരങ്ങള്‍ക്ക് തുടക്കമാകുന്നത്.

തിരിച്ചടികള്‍ കരുത്താക്കാന്‍ കേരള ബ്ലാസ്റ്റേഴ്‌സ്

ഐ.എസ്.എല്‍ പ്ലേ ഓഫില്‍ ബംഗളൂരു എഫ്.സിയ്‌ക്കെതിരെ സുനില്‍ ഛേത്രിയുടെ വിവാദമായ ക്വിക്ക് ഫ്രീക്കിക്ക് ഗോളിലൂടെ തോല്‍വി വഴങ്ങേണ്ടിവന്നതും ഗോളിനെതിരേ പ്രതിഷേധിച്ച് മത്സരം ഉപേക്ഷിച്ചതും തുടര്‍ന്ന് ശിക്ഷ നടപടികള്‍ ഏല്‍ക്കേണ്ടി വന്നതുമെല്ലാം മനസിലുള്ള ബ്ലാസ്റ്റേഴ്‌സ് സൂപ്പര്‍ കപ്പിനിറങ്ങുന്നത് പുതിയ തുടക്കത്തിനാണ്.തിരിച്ചടികള്‍ കരുത്താക്കി മുന്നേറാനുള്ള ഒരുക്കത്തിലാണ് മഞ്ഞപ്പട. മുഖ്യ പരിശീലകന്‍ ഇവാന്‍ വുകോമനോവിച്ചിന്റെ വിലക്കും അഡ്രിയാന്‍ ലൂണയുടെയും പരുക്കേറ്റ ജെസല്‍ കര്‍ണെയ്‌റോയുടെയും അഭാവവും മറികടക്കാനാവുമെന്നാണ് ടീമിന്റെ വിശ്വാസം.