കൊച്ചി: കേരളത്തിലെ മുസ്‌ലിം ന്യൂനപക്ഷങ്ങള്‍ നേരിടുന്ന പിന്നോക്കാവസ്ഥയുടെ നേര്‍ചിത്രം വ്യക്തമാക്കി ന്യൂനപക്ഷ മെറിറ്റ് സ്‌കോളര്‍ഷിപ്പ് കേസില്‍ സംസ്ഥാന സര്‍ക്കാര്‍ ഹൈക്കോടതിയില്‍ സമര്‍പ്പിച്ച മറുപടി സത്യവാങ്മൂലം. കോളജ് പ്രവേശന കാര്യത്തില്‍ പട്ടികജാതി, പട്ടികവര്‍ഗവിഭാഗങ്ങളേക്കാള്‍ പിന്നിലാണ് സംസ്ഥാനത്തെ മുസ്‌ലിം പ്രാതിനിധ്യം എന്നാണ് സര്‍ക്കാര്‍ സമ്മതിക്കുന്നത്. ഭൂമിയുടെ ഉടമസ്ഥതയുടെ കാര്യത്തില്‍ ക്രിസ്ത്യന്‍ സമുദായത്തേക്കാള്‍ ബഹുദൂരം പിന്നിലുമാണ്.

 

കോളജ് വിദ്യാര്‍ഥികളുടെ പ്രവേശന കാര്യത്തില്‍ ഹിന്ദുക്കള്‍ക്ക് 28.1 ശതമാനവും ക്രിസ്ത്യാനികള്‍ക്ക് 20.5 ശതമാനവും മറ്റു പിന്നോക്ക ഹിന്ദു വിഭാഗങ്ങള്‍ക്ക് 16.7 ശതമാനവും പട്ടികവര്‍ഗ

വിദ്യാര്‍ഥികള്‍ക്ക് 11.8 ശതമാനവും പട്ടികജാതി വിദ്യാര്‍ഥികള്‍ക്ക് 10.3 ശതമാനവും പ്രാതിനിധ്യമുള്ളപ്പോള്‍ മുസ്‌ലിം പ്രാതിനിധ്യം 8.1 ശതമാനത്തിലൊതുങ്ങുന്നു. അതേസമയം, തൊഴിലില്ലാത്തവര്‍ക്കിടയിലെ മുസ്‌ലിം പ്രാതിനിധ്യം വളരെ ഉയര്‍ന്നതുമാണ്. തൊഴിലില്ലായ്മയുടെ കാര്യത്തില്‍ മുസ്‌ലിംകള്‍ 55.2 ശതമാനമാണെങ്കില്‍ ക്രൈസ്തവര്‍ക്കിടയില്‍ ഇതു 31.9 ശതമാനവും മറ്റു പിന്നോക്ക വിഭാഗം ഹിന്ദുക്കളുടെ കാര്യത്തില്‍ 40.2 ശതമാനവുമാണ്. 

 

ഭൂരഹിതരുടെ എണ്ണത്തില്‍ 37.8 ശതമാനമാണ് മുസ്‌ലിം പ്രാതിനിധ്യം. മൂന്ന് ശതമാനമാണ് ക്രിസ്ത്യന്‍ പ്രാതിനിധ്യം.സാമ്പത്തിക, സാമൂഹിക, വിദ്യാഭ്യാസ രംഗങ്ങളിലെ മുസ്‌ലിം പിന്നോക്കാവസ്ഥ സച്ചാര്‍ കമ്മിറ്റി പ്രത്യേകം എടുത്തുപറഞ്ഞിരുന്നു. ഈ റിപ്പോര്‍ട്ടിന്റെ അടിസ്ഥാനത്തില്‍ സംസ്ഥാനത്തെ മുസ്‌ലിം പിന്നോക്കാവസ്ഥ പഠിക്കാന്‍ നിയോഗിച്ച 11 അംഗ പാലോളി കമ്മിറ്റിയും ഇതേ കാര്യങ്ങള്‍ വ്യക്തമാക്കിയിരുന്നു. 

 

തുടര്‍ന്നാണ്, പ്രത്യേക കോച്ചിങ് സെന്ററുകള്‍ തുടങ്ങിയതും മുസ്‌ലിം പെണ്‍കുട്ടികള്‍ക്ക് പ്രത്യേക ഹോസ്റ്റല്‍ സ്‌കോളര്‍ഷിപ്പുകളും മറ്റും ആരംഭിച്ചതും. ഇത്തരം സ്‌കോളര്‍ഷിപ്പുകളും പരിശീലന കേന്ദ്രങ്ങളും മുസ്‌ലിം വിദ്യാര്‍ഥികള്‍ക്ക് മാത്രമല്ല, മുന്നോക്ക വിഭാഗ വിദ്യാര്‍ഥികള്‍ക്കും ഏര്‍പ്പെടുത്തിയിട്ടുണ്ടെന്ന കാര്യവും മറുപടിസത്യവാങ്മൂലത്തില്‍ വിശദീകരിക്കുന്നുണ്ട്. മുന്നോക്ക വിഭാഗത്തില്‍പെട്ട വിദ്യാര്‍ഥികള്‍ക്കായി 13 വിദ്യാസമുന്നതി സ്‌കോളര്‍ഷിപ്പുകള്‍ ഏര്‍പ്പെടുത്തിയതും 9.33 കോടി രൂപ ചെലവില്‍ ക്രൈസ്തവ വിഭാഗത്തില്‍പെട്ടവരടക്കമുള്ള മുന്നോക്ക വിദ്യാര്‍ഥികള്‍ക്ക് സ്‌കോളര്‍ഷിപ്പ് ഏര്‍പ്പെടുത്തിയതും കോച്ചിങ് സെന്ററുകള്‍ ആരംഭിച്ച കാര്യവും വിശദീകരിക്കുന്നു.അതേസമയം, 2011ലെ ജനസംഖ്യാ കണക്കെടുപ്പനുസരിച്ച് 54.73 ശതമാനം ഹിന്ദുക്കളും 26.56 ശതമാനം മുസ്‌ലിംകളും 18.38 ശതമാനം ക്രിസ്ത്യാനികളുമാണ് ഉള്ളതെന്ന വാദമാണ് എതിര്‍വിഭാഗം ഉന്നയിച്ചത്. സംസ്ഥാനത്തെ 45.27 ശതമാനം വരുന്ന മൊത്തം ന്യൂനപക്ഷങ്ങളില്‍ 58.67 ശതമാനം മാത്രമാണ് മുസ്‌ലിംകളെന്നും ഈ സാഹചര്യത്തില്‍ മെറിറ്റ് സ്‌കോളര്‍ഷിപ്പില്‍ 80 ശതമാനം അവര്‍ക്കായി നീക്കിവയ്ക്കുന്നത് നീതികരിക്കാനാവില്ലെന്നുമായിരുന്നു എതിര്‍പക്ഷത്തിന്റെ വാദം.