കൊച്ചി: സംവിധായകന്‍ പി.ബാലചന്ദ്രകുമാറിനെ കാവ്യാ മാധവന്‍ വിളിച്ചിരുന്ന നമ്പര്‍ അന്വേഷണ സംഘത്തിനു ലഭിച്ചു.
ഇവര്‍ പല തവണ വിളിച്ചതിന്റെ വിശദവിവരങ്ങളും ലഭ്യമായിട്ടുണ്ട്. ഇരുവരും നടത്തിയ ചാറ്റുകളും ഇതിന്റെ കൂടെയുണ്ട്. ബാലചന്ദ്രകുമാറുമായി ഒരു സിനിമാ ചര്‍ച്ചയുമായി മാത്രമുള്ള ബന്ധമാണെന്ന കാവ്യാ മാധവനും ദിലീപും നല്‍കിയമൊഴിയാണ് ഇതിലൂടെ പൊളിയുന്നത്.
എന്നാല്‍, ഇരുവര്‍ക്കും ബാലചന്ദ്രകുമാറുമായി അടുത്ത് ബന്ധമുണ്ടെന്ന് തെളിയിക്കുന്നത് കൂടിയാണ് ഈ സ്‌ക്രീന്‍ ഷോട്ടുകള്‍. '96456 74686'നമ്പര്‍ കാവ്യ ഉപയോഗിച്ചതിന്റെ തെളിവ് റിപ്പോര്‍ട്ടര്‍ ചാനലും പുറത്തുവിട്ടു. താനും ദിലീപും ഈ നമ്പര്‍ ഉപയോഗിച്ചില്ലെന്നാണ് കാവ്യ അന്വേഷണ സംഘത്തിന് നല്‍കിയ മൊഴി ഇതോടെ പൊളിയുകയാണ്. കാവ്യവിവാഹത്തിന് മുമ്പ് ദിലീപുമായി ആശയ വിനിമയം നടത്തിയതും ഈ നമ്പരില്‍ നിന്നായിരുന്നുവെന്നാണ് ആക്ഷേപം.

ഈ നമ്പറില്‍ നിന്നുള്ള വാട്സ് ആപ്പ് ചാറ്റുകളാണ് അന്വേഷണ സംഘത്തിന് ലഭിച്ചത്. കാവ്യാ മാധവന്റെ അമ്മ ശ്യാമളയുടെ പേരിലുള്ളതാണ് ഈ നമ്പര്‍. നടിയെ ആക്രമിച്ച കേസിലെ സുപ്രധാന തെളിവാണ് ഈ നമ്പറെന്നാണ് വിലയിരുത്തല്‍.

കാവ്യാ മാധവന്‍ ഈ നമ്പറില്‍ നിന്നും പല തവണ ബാലചന്ദ്രകുമാറിന്റെ ഐഫോണിലേക്ക് വിളിച്ചതിന്റെ സ്‌ക്രീന്‍ ഷോട്ടാണ് ചാനല്‍ പുറത്ത് വിട്ടത്. പല തവണ വിളിച്ചതായുള്ള രേഖകള്‍ അന്വേഷണ സംഘത്തിന് ലഭിച്ചിട്ടുണ്ട്. ഇതിന്റെ പശ്ചാത്തലത്തില്‍ ബാലചന്ദ്രകുമാറിന്റെ ഐഫോണ്‍ അന്വേഷണ സംഘം കസ്റ്റഡിയില്‍ എടുത്തിട്ടുണ്ട്.