കൊച്ചി: 'സൂര്യാംശു' ഒരുങ്ങിക്കഴിഞ്ഞു നിങ്ങളെ കൊച്ചിയിലെ കായലോരങ്ങളും, കടലും കാണിക്കാന്‍. ഹൈക്കോടതി ജങ്ഷനിലെ KSINC ക്രൂസ് ടെര്‍മിനലില്‍നിന്ന് കടമക്കുടി, ഞാറക്കല്‍, തിരിച്ച് മറൈന്‍ ഡ്രൈവിലേക്ക് നിങ്ങളെ കൊണ്ട് പോകും ഈ ഡബിള്‍ ഡെക്കര്‍ സൗരോര്‍ജ യാനം. 3.95 കോടി രൂപ ചിലവ് വരുന്ന വെസലില്‍ ഒരേസമയം 100 യാത്രക്കാര്‍ക്ക് സഞ്ചരിക്കാന്‍ സാധിക്കും. ശീതീകരിച്ച കോണ്‍ഫറന്‍സ് ഹാളും ഡിജെ പാര്‍ട്ടി ഫ്‌ലോറും കഫെറ്റീരിയയുമുള്‍പ്പെടെയുള്ള സൗകര്യങ്ങള്‍ ഈ ഡബിള്‍ ഡക്കര്‍ യാനത്തില്‍ ഒരുക്കിയിട്ടുണ്ട്. എറണാകുളം ജില്ലയിലെ ടൂറിസം മേഖലയ്ക്ക് കുതിപ്പ് നല്‍കുന്ന പദ്ധതിയായിരിക്കും 'സൂര്യാംശു'.

കേരള ഷിപ്പിങ് ആന്‍ഡ് ഇന്‍ലാന്‍ഡ് നാവിഗേഷന്‍ കോര്‍പറേഷന്‍ ലിമിറ്റഡ് പുറത്തിറക്കിയിരിക്കുന്ന യാനത്തിന് ജലത്തിലൂടെ വേഗത്തിലുള്ള ചലനം സാധ്യമാക്കാന്‍ ഇരട്ട 'ഹള്‍' ഉള്ള ആധുനിക കറ്റമരന്‍ സാങ്കേതിക വിദ്യയാണ് ഉപയോഗിച്ചിരിക്കുന്നത്.

ക്രൂയിസ് പാക്കേജുകള്‍
പാക്കേജ് 1 @ 799
ഹൈക്കോടതി ജങ്ഷനിലെ കെഎസ്‌ഐഎന്‍സി ക്രൂസ് ടെര്‍മിനലില്‍നിന്ന് കടമക്കുടി വിനോദസഞ്ചാര കേന്ദ്രത്തിലേയ്ക്കും അവിടെ നിന്ന് തിരിച്ച് മറൈന്‍ ഡ്രൈവിലേയ്ക്കും പോകുന്ന വിധത്തില്‍ 6 മണിക്കൂര്‍ നീളുന്നതാണ് ഒരു പാക്കേജ്.
പാക്കേജ് 2 @ 999

7 മണിക്കൂര്‍ ദൈര്‍ഘ്യമുള്ളതും മറൈന്‍ ഡ്രൈവില്‍ നിന്ന് ആരംഭിച്ച് ഞാറക്കല്‍ വഴി അവിടെ നിന്ന് തിരിച്ച് ഹൈക്കോടതി ജങ്ഷനിലെ കെഎസ്‌ഐഎന്‍സി ക്രൂസ് ടെര്‍മിനലില്‍ വരെയുള്ളതുമായ യാത്രയാണ് മറ്റൊരു പാക്കേജ്. മറൈന്‍ ഡ്രൈവ്-കടമക്കുടി ഇടനാഴിയിലും പിന്നീട് 10 കിലോമീറ്റര്‍ കടലിലുമായി സര്‍വീസ് നടത്തുന്ന കപ്പലിന് ഒരാള്‍ക്ക് 799 രൂപ നിരക്കില്‍ ആറ് മണിക്കൂര്‍ ദിവസത്തെ ക്രൂയിസ് ഉണ്ടായിരിക്കും. അതിനിടയില്‍, അതിഥികള്‍ക്ക് ഒരു ദ്വീപില്‍ ഇറങ്ങാനും ഉച്ചഭക്ഷണം കഴിക്കാനും ആംഗ്ലിംഗ്, ബോട്ടിംഗ് തുടങ്ങിയ പ്രവര്‍ത്തനങ്ങളില്‍ പങ്കെടുക്കാനും കഴിയും. ഏഴു മണിക്കൂര്‍ ദൈര്‍ഘ്യമുള്ള 999 പാക്കേജില്‍, മത്സ്യഫെഡിന്റെ ഞാറക്കലിലെ മത്സ്യ ഫാം സന്ദര്‍ശിക്കാം.

''സൗരോര്‍ജ്ജത്തില്‍ പ്രവര്‍ത്തിക്കുന്ന കേരളത്തിലെ ആദ്യത്തെതും, ഏറ്റവും വലിയ ടൂറിസ്റ്റ് കപ്പലുമാണിത്. മുകളിലെ ഡെക്കിന്റെ മേല്‍ക്കൂരയിലെ സോളാര്‍ പാനലുകള്‍ നല്‍കുന്ന ഊര്‍ജ്ജത്തിലാണ് കപ്പല്‍ ക്രൂയിസ് ചെയ്യുക'' KSINC ചെയര്‍മാന്‍ ചാക്കോ പറഞ്ഞു. ഇനി 150 പേര്‍ക്ക് യാത്ര ചെയ്യാവുന്ന ടൂറിസ്റ്റ് കപ്പല്‍ നിര്‍മിക്കുമെന്ന് KSINC മാനേജിംഗ് ഡയറക്ടര്‍ ആര്‍. ഗിരിജ പറഞ്ഞു. 'KSINC യുടെ ടൂറിസ്റ്റ് കപ്പലുകളായ സാഗര റാണി I, സാഗര റാണി II എന്നിവ നിലവില്‍ മറൈന്‍ ഡ്രൈവില്‍ നിന്ന് കടലിലേക്ക് ടൂറിസ്റ്റ് യാത്രകള്‍ നടത്താറുണ്ട്. ബേപ്പൂരിലെ ഒരു ബോട്ട് ജെട്ടിയുടെ പണി കഴിഞ്ഞാല്‍ അവിടെയും ടൂറിസ്റ്റ് സര്‍വീസ് ആരംഭിക്കും''.