കവരത്തി: ലക്ഷദ്വീപ് കലക്ടറുടെ കോലം കത്തിച്ചതിന് കില്‍ത്താന്‍ ദ്വീപില്‍ അറസ്റ്റിലായവരില്‍ ഒരാള്‍ക്ക് കൊവിഡ് സ്ഥിരീകരിച്ചു. ഇയാളെ ആശുപത്രിയിലേക്ക് മാറ്റിയിട്ടുണ്ടെന്നാണ് റിപ്പോര്‍ട്ട്. എന്നാല്‍ അറസ്റ്റിലായവരെല്ലാം ഒന്നിച്ചാണ് താമസിച്ചിരുന്നത്.

കില്‍ത്താന്‍ ദ്വീപിനെതിരെയുള്ള കലക്ടറുടെ പ്രസ്താവനയില്‍ പ്രതിഷേധിച്ചായിരുന്നു ഇവര്‍ കലക്ടറുടെ കോലം കത്തിച്ചത്. ആദ്യം 12 പേരെയും ഇന്നലെ 11 പേരെയുമാണ് അറസ്റ്റ് ചെയ്തതെന്നാണ് റിപ്പോര്‍ട്ട്.

കില്‍ത്താന്‍ ദ്വീപില്‍ നിന്ന് പൊലിസ് അറസ്റ്റ് ചെയ്ത് റിമാന്‍ഡിലാക്കിയവരെ കാണാന്‍ അനുവദിക്കുന്നില്ലെന്ന പരാതിയുമായി ബന്ധുക്കള്‍ രംഗത്തെത്തി.

കില്‍ത്താന്‍ ദ്വീപില്‍ നിന്ന് ലക്ഷദ്വീപ് കില്‍ത്താന്‍ ദ്വീപ് ലഹരിമാഫിയയുടെ കേന്ദ്രമാണെന്നതുള്‍പെടെ വസ്തുതാവിരുദ്ധമായ പരാമര്‍ശങ്ങള്‍ കലക്ടര്‍ വാര്‍ത്താസമ്മേളനത്തില്‍ നടത്തിയിരുന്നു. ഇതിനെതിരെ യൂത്ത് കോണ്‍ഗ്രസിന്‍രെ നേതൃത്വത്തില്‍ വ്യാപക പ്രതിഷേധം നടന്നു. പിന്നാലെയായിരുന്നു അറസ്റ്റ് നടന്നത്.

അറസ്റ്റ് ചെയ്ത ദിവസം തന്നെ റിമാന്‍ഡ് ചെയ്‌തെങ്കിലും അവരെ പാര്‍പ്പിക്കാന്‍ ജയിലുകളില്ലാത്തതിനാല്‍ പൊലീസ് സ്റ്റേഷന് തൊട്ടടുത്ത കമ്മ്യൂണിറ്റി ഹാളിലാണ് പാര്‍പ്പിച്ചത്. ഇന്നലെ അറസ്റ്റ് ചെയ്ത 11 പേരെയും ഇതേ കമ്യൂണിറ്റി ഹാളിലാണ് റിമാന്‍ഡിലാക്കിയത്. സാമൂഹിക അകലം പോലുമില്ലാതെയാണ് താമസം.