കോട്ടയത്തെ ആതിരയുടെ ആത്മഹത്യ; പ്രതി ലോഡ്ജില്‍ മരിച്ചനിലയില്‍

കോട്ടയം: സൈബര്‍ അധിക്ഷേപത്തെത്തുടര്‍ന്ന് കോട്ടയം കടുത്തുരുത്തില്‍ ആതിര ജീവനൊടുക്കിയ കേസിലെ പ്രതി അരുണ്‍ വിദ്യാധരനെ ആത്മഹത്യ ചെയ്ത നിലയില്‍ കണ്ടെത്തി. കാഞ്ഞങ്ങാട് നോര്‍ച്ച് കോട്ടച്ചേരിയിലെ അപ്‌സര ലോഡ്ജിലാണ് പ്രതിയെ തൂങ്ങിംരിച്ച നിലയില്‍ കണ്ടെത്തിയത്.

ആതിരയുടെ ആത്മഹത്യയ്ക്ക് പിന്നാലെ ഇയാള്‍ ഒളിവില്‍ പോയിരുന്നു. പ്രതിക്കായി പൊലിസ് ലുക്കൗട്ട് നോട്ടിസും പുറപ്പെടുവിച്ചിരുന്നു. ഇതിനിടയിലാണ് ഇയാളെ മരിച്ച നിലയില്‍ കണ്ടെത്തിയത്.

മെയ് രണ്ടിനാണ് അരുണ്‍, രാകേഷ് പെരിന്തല്‍മണ്ണ എന്ന പേരില്‍ ഇവിടെ മുറിയെടുത്തത്.മുറി തുറക്കാതായതോടെയാണ് ജീവനക്കാര്‍ പൊലിസിനെ വിവരമറിയിച്ചത്.

ഇക്കഴിഞ്ഞ ഞായറാഴ്ചയാണ് അരുണ്‍ ആതിരക്കെതിരെ അപകീര്‍ത്തികരമായ ഫെയ്‌സ്ബുക്ക് പോസ്റ്റ് ഇട്ടത്. ഇതിന് പിന്നാലെ തന്നെ പൊലീസ് അരുണിനായി അന്വേഷണം തുടങ്ങിയിരുന്നെങ്കിലും അപ്പോഴേക്കും അരുണ്‍ ഒളിവില്‍ പോയി.തിങ്കളാഴ്ച ആതിര ജീവനൊടുക്കി.

രണ്ടു വര്‍ഷം മുമ്പ് അരുണും കുടുംബവും ആതിരയെ വിവാഹമാലോചിച്ചിരുന്നു. എന്നാല്‍ വിവാഹത്തില്‍ നിന്ന് ഇവര്‍ പിന്‍മാറി. ഇതിന്റെ പേരിലുണ്ടായ പകയാണ് ആതിരയുടെ വിവാഹം ഉറപ്പിച്ചതിന് പിന്നാലെ അരുണ്‍ ഫെയ്‌സ്ബുക്കില്‍ അധിക്ഷേപ പോസ്റ്ററിട്ടത്.

ചിത്രങ്ങള്‍ മോശം അടിക്കുറിപ്പുകളോടെ പ്രചരിപ്പിച്ചു. ഫോണില്‍ വിളിച്ചും ഭീഷണി തുടര്‍ന്നു. സഹോദരി ഭര്‍ത്താവിന്റെ നിര്‍ദ്ദേശപ്രകാരം അന്ന് തന്നെ ആതിര പൊലിസില്‍ പരാതി നല്‍കി. ഇതിന്റെ പേരില്‍ അരുണ്‍ ആതിരയെ ഭീഷണിപ്പെടുത്തി. ഇതിനു പിന്നാലെയാണ് ആതിര ആത്മഹത്യ ചെയ്തത്.