തിരുവനന്തപുരം: മെഡിക്കല്‍ കോളജില്‍ വൃക്ക മാറ്റിവെക്കല്‍ ശസ്ത്രക്രിയ വൈകി രോഗി മരിച്ച സംഭവത്തില്‍ ഗുരുതര വീഴ്ചയുണ്ടായെന്ന് പ്രാഥമിക അന്വേഷണ റിപ്പോര്‍ട്ട്. ഏകോപനത്തില്‍ പിഴ ഉണ്ടായെന്നും റിപ്പോര്‍ട്ട് പറയുന്നു. ശസ്ത്രക്രിയ നടത്തുമ്പോള്‍ സീനിയര്‍ സര്‍ജന്‍മാര്‍ ഡ്യൂട്ടിയില്‍ ഉണ്ടായിരുന്നില്ല.

യുറോളജി, നെഫ്രോളജി ഡോക്ടര്‍മാരെ മേധാവികള്‍ നിയോഗിച്ചില്ലെന്നും റിപ്പോര്‍ട്ടിലുണ്ട്. വൃക്ക എത്തി രണ്ടര മണിക്കൂറിനു ശേഷമാണ് സര്‍ജന്‍മാരെ വിളിച്ചുവരുത്തിയത്. ശസ്ത്രക്രിയക്കിടെ ഒരു സര്‍ജനെ കൂടി വിളിച്ചുവരുത്തി. കൂടുതല്‍ വിശദമായി അന്വേഷിക്കണമെന്ന് റിപ്പോര്‍ട്ടില്‍ നിര്‍ദേശമുണ്ട്.

കാരക്കോണം സ്വദേശി സുരേഷ് കുമാറാണ് മരിച്ചത്. സംഭവത്തില്‍ പൊലിസ് അസ്വാഭാവിക മരണത്തിനാണ് കേസ് എടുത്തിട്ടുണ്ട്. സുരേഷ്‌കുമാറിന്റെ സഹോദരന്‍ നല്‍കിയ പരാതിയിലാണ് മെഡിക്കല്‍ കോളജ് പൊലിസ് കേസെടുത്തത്.

ബന്ധുക്കളുടെ മൊഴി പൊലിസ് അന്ന് രേഖപ്പെടുത്തും. സുരേഷ്‌കുമാറിന്റെ മൃതേദഹം ഇന്ന് പോസ്റ്റ്‌മോര്‍ട്ടം ചെയ്യും. പോസ്റ്റ്‌മോര്‍ട്ടം റിപ്പോര്‍ട്ടിലെ മരണകാരണം അറിഞ്ഞ ശേഷമായിരിക്കും പൊലീസ് കൂടുതല്‍ അന്വേഷണങ്ങളിലേക്ക് നീങ്ങുക.

ആശുപത്രി അധികൃതര്‍ നടത്തിയ പ്രാഥമിക അന്വേഷണത്തിന്റെ അടിസ്ഥാനത്തില്‍ യൂറോളജി, നെഫ്രോളജി മേധാവികളെ സസ്‌പെന്റ് ചെയ്തിരുന്നു. ഡോ. വാസുദേവന്‍ പോറ്റി, ഡോ. ജേക്കബ് ജോര്‍ജ് എന്നിവരെയാണ് സസ്‌പെന്ഡ് ചെയ്തത്. എന്നാല്‍ ഡോക്ടര്‍മാരെ ബലിയാടാക്കുകായണെന്ന ആരോപണവുമായി മെഡിക്കല്‍ കോളജ് അധ്യാപകരുടെ സംഘടനായ കെ.ജി.എം.സി.ടി.എ രംഗത്തുവന്നിട്ടുണ്ട്.

എറണാകുളം രാജഗിരി ആശുപത്രിയില്‍ ചികിത്സയിലുണ്ടായിരുന്ന മസ്തിഷ്‌ക മരണം സംഭവിച്ച 34 കാരന്റെ വൃക്കയാണ് തിരുവനന്തപുരം മെഡിക്കല്‍ കോളേജിലേക്ക് കൊണ്ടുവന്നത്. മൂന്ന് മണിക്കൂറുകൊണ്ടാണ് എറണാകുളത്ത് നിന്ന് മാറ്റിവെക്കേണ്ട വൃക്കയുമായി ആംബുലന്‍സ് മെഡിക്കല്‍ കേളേജിലെത്തിയത്. മെഡിക്കല്‍കോളജില്‍ നാല് മണിക്കൂര്‍ കഴിഞ്ഞാണ് ശസ്ത്രിക്രിയ നടന്നത്. ശസ്ത്രക്രിയ വൈകിയതിനാലാണ് കാരണക്കോണം സ്വദേശിയായ സുരേഷ് കുമാര്‍ മരിച്ചതെന്നാണ് ആക്ഷേപം.