കോപ്പ അമേരിക്കയില്‍ അര്‍ജന്റീനക്ക് സമനിലയോടെ തുടക്കം. ആദ്യ മത്സരത്തില്‍ ചിലിക്കെതിരെയാണ് 1-1ന് അര്‍ജന്റീന സമനിലയില്‍ കുരുങ്ങിയത്. ആദ്യ പകുതിയിലെ 32ാം മിനിറ്റില്‍ സൂപ്പര്‍ താരം ലയണല്‍ മെസിയുടെ മനോഹരമായ ഫ്രീകിക്ക് ഗോളില്‍ അര്‍ജന്റീന മുന്നിലെത്തി. സമനിലക്ക് വേണ്ടി കളിച്ച ചിലി രണ്ടാം പകുതിയില്‍ വര്‍ഗാസിന്റെ ഗോളില്‍ സമനില കണ്ടെത്തി. വിദാല്‍ പെനാല്‍റ്റിയെടുത്തെങ്കിലും ഗോള്‍ കീപ്പര്‍ തടഞ്ഞിട്ടു, ഇതോടെ റീബൗണ്ടിലൂടെ ലഭിച്ച പന്ത് വാര്‍ഗാസ് വലയിലെത്തിച്ചു. തുടര്‍ന്ന് അര്‍ജന്റീന ലീഡിനായി കിണഞ്ഞ് ശ്രമിച്ചെങ്കിലും ഗോള്‍ കണ്ടെത്താനായില്ല.